މުޒާހަރާކުރަން އުޅޭތީވެ، ލޮކްޑައުންއަކަށް ދާން އެބައުޅޭ: ޝިޔާމް

ގައުމު ވިއްކާލުމާއި ދެކޮޅަށް މުޒާހަރާ ކުރަން އުޅޭތީވެ، ލޮކްޑައުންއަކަށް ދާން އެބަ އުޅޭ ކަމަށް ޕީޕީއެމްގެ ނައިބު ރައީސް، ނައިފަރު ދާއިރާގެ މެންބަރު އަޙްމަދު ޝިޔާމު ވިދާޅުވެއްޖެއެވެ.

ޝިޔާމު ކުރެއްވި ޓްވީޓެއްގައި ވިދާޅުވީ، ހުކުރު ދުވަހު ހަވީރު ރާއްޖޭގެ ހުރިހާ ހިސާބެއްގައި ރައްޔިތުން އިހުތިޖާޖް ކުރަން ނިންމާފައިވާތީވެ، އެކަން ހުއްޓުވަން ރައީސް އިބްރާހިމް މުޙައްމަދު ޞާލިހު ލޮކްޑައުންއަކަށް ދާން އުޅުއްވާ ވާހަކަ އަޑު އިވެމުންދާ ކަމަށެވެ.

'Qaumu vikkalumaai dhekolhah' madhama haveeru Raajjeyge huriha hisaabehgai rayyithun ihuthijaaj kuran nimmaafaivaathee ekan huttuvan @ibusolih lockdown akah dhaan ulhuvva vahaka adu ivey. Rayyithun geyah vahdhaafa kuraakanthah rayyithunnah eba enegey.Rayyithun madakun nuthibeyne. pic.twitter.com/utRdgX4Dvb

— Ahmed Shiyam (@Shiyamaldives) August 27, 2020

ޝިޔާމު ވިދާޅުވީ، ރައްޔިތުން ގެޔަށް ވައްދާފައި ކުރާ ކަންތައްތައް ރައްޔިތުންނަށް އެބަ އެނގޭ ކަމަށެވެ. އަދި ރައްޔިތުން މަޑަކުން ނުތިބޭނެކަމަށްވެސް ޝިޔާމު ވިދާޅުވިއެވެ.

ގައުމު ވިއްކާލުމާއި ދެކޮޅަށް ކަމަށް ބުނެ އިދިކޮޅު ކޯލިޝަނުން މާލެ ފިޔަވައި އެހެން ހުރިހާ ހިސާބެއްގައި މުޒާހަރާ ކުރުމަށް ވަނީ ނިންމާފައެވެ. ޕީއެންސީ އާއި ޕީޕީއެމުން ތުހުމަތު ކުރާ ގޮތުގައި ސަރުކާރުން ދަނީ ރާއްޖެ ތަރައްގީ ކުރުމުގެ ނަމުގައި، ގައުމުގެ ހަރު މުދާ ވިއްކައިގެން ލޯނު ނަގަމުންނެވެ. އެހެންވެ، އެ ޕާޓީތަކުގެ މެމްބަރުންގެ އިތުރުން އެމްޑީޕީގެ މެމްބަރުން ވެސް މުޒާހަރާގައި ބައިވެރިވުމަށް ކޯލިޝަނުންވަނީ ގޮވާލާފައެވެ.