ޖުލައި މަސް: ދަޢުލަތަށް ލިބުނު އާމްދަނީ ބޮޑު ތަނުން ދަށަށް

ހުސްވި ޖުލައިމަހުގައި ދަޢުލަތަށް ލިބުނު އާމްދަނީ ބޮޑުތަނުން ދަށަށް ހިނގައްޖެއެވެ.

ފިނޭންސް މިނިސްޓްރީގެ ތަފާސްހިސާބުތަކަށް ބަލާއިރު 2019 ވަނަ އަހަރުގެ ޖުލައިމަހުގައި ދަޢުލަތަށް ލިބުނު އާމްދަނީއާއި އަޅާބަލާއިރު މި އަހަރުގެ ޖުލައިމަހުގެ ލިބުނު އާމްދަނީ %78 ދަށަށް ގޮސްފައެވެ.

ހުސްވި 2019 ވަނަ އަހަރު ޖުލައިމަހުގައި އާމްދަނީއާއި އެހީގެގޮތުގައި ދަޢުލަތަށް ލިބިފައިވަނީ 682.2 މިލިއަން ރުފިޔާއެވެ.

ނަމަވެސް މިއީ ހުސްވި އަހަރުގެ ޖުލައިމަހުގައި ދަޢުލަތަށް ލިބުނު 3.1 ބިލިއަން ރުފިޔާގެ އާމްދަނީއާ އަޅާބަލާއިރު 78 އިންސައްތަ ދަށް ޢަދަދެކެވެ.

ހުސްވި އަހަރުގެ ޖުލައިމަހުގައި ޓެކްސްގެ ގޮތުގައި ދަޢުލަތަށް 2.2 ބިލިއަން ރުފިޔާ ލިބިފައިވެއެވެ. ނަމަވެސް މި އަހަރުގެ ޖުލައިމަހު ލިބިފައިވަނީ 589.2 މިލިއަން ރުފިޔާއެވެ.

ޓެކްސް ފިޔަވައި އެހެނިހެން ގޮތްގޮތުން އާމްދަނީގެ ގޮތުގައި ހުސްވި އަހަރުގެ ޖުލައިމަހުގައި 414 މިލިއަން ރުފިޔާ ލިބިފައިވާއިރު މި އަހަރުގެ ޖުލައިމަހުގައި ދަޢުލަތަށް ލިބިފައިވަނީ 87.8 މިލިއަން ރުފިޔާއެވެ.