އެއްވެސް ސަބަބަކާ ހުރެ، އާންމު ސިއްހަތުގެ ނިޒާމަށް ހުރަސްއެޅުމަކީ ބަލައިގަނެވޭނެ ކަމެއް ނޫން ކަމަށާއި، އެފަދަ މައްސަލަތައް ބަލައި އަޅަންޖެހޭ ފިޔަވަޅު ސަރުކާރުން އަޅާނެ ކަމަށް، ހޯމް މިނިސްޓަރު އިމްރާން އަބްދުﷲ ވިދާޅުވެއްޖެއެވެ.
އިމްރާން މިފަދައިން ވިދާޅުވިއިރު އާއްމު ސިއްހަތު ރައްކާތެރިކުރުމުގެ ގާނޫނުގެ ދަށުން ކޮވިޑް-19 ގެ ސަބަބުން ހެލްތު ޕްރޮޓެކްޝަން އެޖެންސީ (އެޗްޕީއޭ) އިން އާއްމުކޮށްފައިވާ ގައިޑްލައިންތަކާއި ހިލާފަށް އިދިކޮޅު ކޯލިޝަނުން މިދިޔަ ހުކުރު ދުވަހު މާލޭގައި ބޭއްވި ސައިކަލު ބުރަކާއި ގުޅިގެން އެ ކޯލިޝަންގެ އިސްވެރިންތަކެއް ވަނީ ފުލުހުންގެ އިދާރާއަށް ހާޒިރު ކުރައްވާފައެވެ.
Siyaasee sababakaa hureviyas adhi ehen sababakaa hureviyas aammu sihhathuge nizaamah huraselhumakee balaiganeveyne kameh noon. Mifadha massalathah balaa alhan jehey fiyavalhuthah sarukarun alhaane!
— Imran Abdulla (@ShimranAb) August 31, 2020
މީގެތެރެއިން ބައެއް ބޭފުޅުން ވަނީ މާސްކު ނާޅާ އުޅުމުން ކަމަށް ވިދާޅުވެ 1،000 ރުފިޔާއިން ޖޫރިމަނާ ކޮށްފައެވެ. ފުލުހުންގެ އިދާރާއަށް ހާޒިރު ކުރެއްވި ބޭފުޅުންގެ ތެރޭގައި އިދިކޮޅު ކޯލިޝަންގެ އެޑްވައިޒަރު އަދި ކުރީގެ ރައީސް ޑރ. މުހައްމަދު ވަހީދާއި ޕީއެންސީގެ ރައީސް އަދި އިދިކޮޅު ކޯލިޝަން މިވަގުތު ލީޑު ކުރައްވަމުން ގެންދަވާ އަބްދުއްރަހީމް އަބްދުﷲ (އަދުރޭ) އަދި ޕީއެންސީގެ ނާއިބު ރައީސް އިބްރާހީމް ޝުޖާއުގެ އިތުރުން ޕީޕީއެމްގެ ނާއިބު ރައީސް އަދި ނައިފަރު ދާއިރާގެ މެންބަރު އަހުމަދު ޝިޔާމް ހިމެނިވަޑައިގަންނަވައެވެ.