މި ދަނޑިވަޅުގައި މާލީ ދަތިކަމާއި މާޔޫސްކަން އިތުރުވާ ގޮތަށް މިންގަނޑުތައް ތަންފީޒު ކުރުން އިންސާފުވެރިއެއް ނޫން ކަމަށް އެމްޑީޕީގެ ކުރީގެ ސެކްރަޓަރީ ޖެނެރަލް އަދި މާލޭ ސިޓީ މޭޔަރު ކަމަށް އެމްޑީޕީ ޓިކެޓްގައި ވާދަކުރާ އަނަސް އަބްދުއްސައްތާރު ވިދާޅުވެއްޖެ އެވެ.
އަނަސް މިހެން ވިދާޅުވީ ރަޖިސްޓްރީ ނުކޮށް އޮންލައިންކޮށް ކާބޯތަކެތީގެ ވިޔަފާރި ނުކުރެވޭ ގޮތަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ނިންމުމުންމާ ގުޅިގެންނެވެ.
އަނަސް ކުރެއްވި ޓުވީޓެއްގައި ވިދާޅުވީ ކޮވިޑް-19 ގެ ބަލިމަޑުކަމުގެ ހާލަތަކީ އުފެއްދުންތެރިކަމަށް ހިތްވަރުދީ، އާމްދަނީ ހޯދުމުގެ ފުރުސަތު ފަހިކޮށް ދިނުން މުހިއްމުވެފައިވާ ދަނޑިވަޅެއް ކަމަށެވެ. ދިމާވެފައިވާ މާލީ ދަތިކަމާއި، މާޔޫސްކަން އިތުރުވާ ގޮތަށް މިންގަނޑުތައް ތަންފީޒު ކުރުމަކީ އިންސާފުވެރި ގޮތެއް ނޫން ކަމަށް އަނަސް ވިދާޅުވިއެވެ.
“މި ދަތި ހާލަތުން އަރައިގަތުމަށް ރައްޔިތުން ގޭގައި ކުރާ އަމިއްލަ ބުރަ މަސައްކަތް ހުއްޓުވާލުމަށް ވުރެ އެކަށީގެންވާ ވަގުތު ދިނުމާއެކު ކާބޯތަކެތި ތައްޔާރު ކުރުމާއި، ޕެކޭޖް އަދި ޑެލިވަރީގެ ސަލާމަތީ މިންގަނޑުތައް އެކުލަވާލައި، އަމަލު ކުރެވޭނެ މަގު ފަހިކޮށްދިނުމަށް އެޗްޕީއޭއަށް ގޮވާލަން،” އަނަސް ވިދާޅުވިއެވެ.
Covid19ge midhathi haalugai ufehdhuntherikamah hivvarudhy, aamdhany hoadhumuge furusathu fahikoh dhinun muhimmu vefaivaa mi dhandivalhugai, dhimaavefaivaa maaly dhathikamaa, maayooskan ithuruvaagothah minganduthah thanfeez kurumaky insaafuveri gotheh noon. Adhi ae hallehves noon.
— Anas Abdul Sattar (@anasabdulsattar) September 2, 2020
އެޗްޕީއޭއިން އޮގަސްޓް 31 ވަނަ ދުވަހު ނެރުނު ނޫސްބަޔާނެއްގައި ބުނެފައިވަނީ، ރަޖިސްޓްރީ ނުކުރާ ބަދިގެ ފަދަ ތަންތަނުގައި ކާބޯތަކެތި ތައްޔާރުކޮށް ވިއްކުމާއި ފިހާރަތަކާއި ގޭގޭގައިި ކާބޯތަކެތީގެ ބާވަތްތަކާއި ދުންފަތުގެ ބާވަތްތައް އޮންލައިން ޕްލެޓްފޯމްތަކުގައި އިސްތިހާރުކޮށް ވިއްކާ ނަމަ ގަވާއިދުގާވާ ގޮތުގެ މަތިން ފިޔަވަޅު އެޅުމަށް ނިންމާފައިވާ ކަމަށެވެ.
އެޗްޕީއޭގެ މި ނިންމުމަށް ގިނަ ބަޔަކު ފާޑުކިޔަމުން އަންނައިރު ކުދި އަމިއްލަ ވިޔަފާރިތަކަށް ހުރަސް ނޭޅުމަށްވެސް މީސް މީޑިއާގައި އަންނަނީ ގޮވާލަމުންނެވެ.
advertisment