ރާއްޖޭގެ ދަރަނި މަތިވަމުންދާއިރު، އެ އަދަދުތަކުން ބުނެދެނީ އަޅުވެތިކަމަށް މި ގައުމު ހުށަހެޅިފައިވާ މިންވަރު ކަމަށް ނައިފަރު ދާއިރާގެ މެމްބަރު އަދި ޕީޕީއެމްގެ ނައިބް ރައީސް އަހުމަދު ޝިޔާމް ވިދާޅުވެއްޖެއެވެ.
ފިނޭންސް މިނިސްޓްރީ އިން އާންމުކޮށްފައިވާ ތަފާސްހިސާބުތަކަށް ބަލާއިރު، ރާއްޖޭގެ ޖުމްލަ ދަރަނި ވަނީ 73.9 ބިލިއަން ރުފިޔާއަށް އަރާފައެވެ. މިއަހަރުގެ ޖޫން މަހުގެ ނިޔަލަށް ބޭރުގެ ދަރަނި ހުރީ 37.7 ބިލިއަން ރުފިޔާގަ އެވެ. އެތެރޭގެ ދަރަނި ހުރީ 36.1 ބިލިއަން ރުފިޔާގަ އެވެ.
ރާއްޖޭގެ ދަރަނި ދުވަހެއް ދުވަހަކަށް މަތިވަމުންދިއުމާ ގުޅިގެން ކަންބޮޑުވުން ފާޅުކުރައްވައި ޝިޔާމް ކުރެއްވި ޓްވީޓެއްގައި ވިދާޅުވީ ދަރަނީގެ އަދަދުތަކުން ދައްކުވައިދެނީ ގައުމުގެ ނިކަމެތި ހާލުތު ކަމަށާއި ފޮރިން އިންވެސްޓަރުންނާއި ފަންޑު އެޖެންސީތަކަށް މިއީ ބިރުވެރި އަދަދުތަކެއް ކަމަށެވެ.
“އަދަދުތައް ބުނެދެނީ ސަރުކާރުގެ ނާގާބިލްކަން، އަދަދުތަކުން ބުނެދެނީ އަޅުވެތިކަމަށް މި ގައުމު ހުށަހެޅިފައިވާ މިންވަރު.” ޝިޔާމް ވިދާޅުވިއެވެ.
Mi adhadhuthakun dhakkuvaidhenee qaumuge nikamethi haalath. Foreign Investerunnah adhi funding agency thakah mee biruveri adhadhuthakeh. Adhadhuthah bunedhenee sarukaaruge naaqaabilkan. Adhadhuthah bunedhenee alhuvethikamah mi qaumu husha elhifaiva minvaru. #FreePresidentYameen pic.twitter.com/FofScwpoI8
— Ahmed Shiyam (@Shiyamaldives) September 7, 2020
މިއަހަރުގެ ދެވަނަ ކުއާޓަރުގެ ނިޔަލަށް ރާއްޖޭގެ ދަރަނި ގާތްގަނޑަކަށް 74 ބިލިއަނަށް އަރާފައިވާއިރު ސަރުކާރުން ވަނީ ކޮވިޑް19 އާއި ގުޅިގެން އެކި ކަންތަކަށް ބޭރުން ލޯނު ހޯދައިފައެވެ. ރާއްޖެއަށް އާމްދަނީ ލިބެމުން އައި މައި ސިނާއަތްކަމަށްވާ ޓޫރިޒަމް ސިނާއަތް ހުއްޓި އާމްދަނީ ލިބެނެ ގޮތްތައް ހުއްޓިފައިވާއިރު، ރައްޔިތުންނަށް ފޯރުކޮށްދެންޖެހޭ ހިދުމަތްތައް ފޯރުކޮށްދިނުމަށް ސަރުކާރުން ވަނީ ގިނަ އަދަދެއްގެ ލޯނު ނަގައިފައެވެ. އަދި ސެންޓްރަލް ބޭންކުން ވަނީ ހަތަރު ބިލިއަން ރުފިޔާ އޯވާޑްރޯ ކޮށްފަ އެވެ.
ދަރަނި މަތިވަމުން ދިޔަ ނަމަވެސް ދަރަނި މެނޭޖު ކުރުމުގެ ގާބިލްކަން އެބަހުރި ކަމަށް ފިނޭންސް މިނިސްޓަރު އިބްރާހިމް އަމީރު މީގެ ކުރިން ވަނީ ވިދާޅުވެފައެވެ.