ހޯނޑެއްދޫން އިތުރު ދެ މީހަކު ޕޮޒިޓިވްވެ، އެ ރަށުން ބަލި ޖެހުނު މީހުންގެ އަދަދު 38 އަށް

އެޗްއީއޯސީން ބުނީ ހޯނޑެއްދޫން ޕޮޒިޓިވްވެފައި ވަނީ 18 އަހަރުގެ ދެ ފިރިހެނުން ކަމަށާއި އެ ދެ މީހުންނަކީ ވެސް ޕޮޒިޓިވް މީހެއްގެ ކޮންޓެކްޓުން ކަމަށެވެ.

އެ ރަށުން މި ބައްޔަށް ޕޮޒިޓިވްވި މީހުންގެ އަދަދު މިހާރު ވަނީ 38 އަށް އަރާފައެވެ.

ހޯނޑެއްދޫ އެންމެ ފުރަތަމަ ޕޮޒިޓިވްވީ ހޯމް ކަރަންޓީނުގައި ތިބި ހަތަރު މީހަކެވެ. އެ ދެ ކޭސްއާ ގުޅިގެން އެ ރަށުން ރެންޑަމްކޮށް ނެގި ސާމްޕަލްތަކުގެ ތެރެއިން ދެ މީހަކު ޕޮޒިޓިވްވުމާ ގުޅިގެން ކުރިއަށްގެންދިޔަ ކޮންޓެކްޓް ޓްރޭސިންގެ ތެރެއިން އިތުރު 19 މީހަކު ވަނީ މިދިޔަ ހަފްތާގައި ކޮވިޑަށް ޕޮޒިޓިވް ވެފައެވެ.

އެ 19 މީހުންގެ ކޮންޓެކްޓުންގެ ގޮތުގައި މިހާތަނަށް 111 ކޮންޓެކްޓުން މިހާތަނަށް ފާހަގަކުރެވިފައިވާ ކަމަށާއި އޭގެތެރެއިން 63 މީހުންގެ ކިބައިން ބަލީގެ އަލާމާތް ފެނިފައިވާ ކަމަށް އެޗްއީއޯސީން ބުނެއެވެ.

ހޯނޑެއްދުއަށް ބަލި ދިޔައީ ކިހިނެއްކަން ދެނެގަތުމުގެ މަސައްކަތް މިހާރު އަންނަނީ ކުރަމުންނެވެ.