ވައްކަން ފޮރުވަން އުޅޭ ކަމުގެ އިލްޒާމު އެޅޭކަށް އެމްޑީޕީން ބޭނުމެއް ނުވާ ކަމަށް އެ ޕާޓީގެ ޗެއާޕާސަން އަދި ހެންވޭރު ހުޅަނގު ދާއިރާގެ މެމްބަރު ހަސަން ލަތީފު ވިދާޅުވެއްޖެއެވެ.
ހިޔާނާތުގެ ފައިސާ އިން މަންފާ ނުލިބޭ ސިޔާސީ ޕާޓީއެއް ނެތް ކަމަށް ކުރީގެ ނައިބު ރައިސް އަހުމަދު އަދީބު އަބްދުލްޣަފޫރު އިއްޔެ ވަނީ ވިދާޅުވެފަ އެވެ.
އިއްޔެގެ ޝަރީއަތުގެ މަޖިލީހުގައި ވާހަކަ ދައްކަވަމުން އަދީބު ވިދާޅުވީ އެ މައްސަލައަކީ ވަރަށް ގިނަ ބައެއް ޝާމިލްވާ މައްސަލައެއް ކަމަށާއި މި މައްސަލައަށް ވަރަށް ގިނަ ބަޔަކަށް މަންފާވާ ކަމަށެވެ. އެގޮތުން އެ މައްސަލައިން މަންފާ ނުވާ ސިޔާސީ ޕާޓީއެއް ނުވާ ކަމަށާއި އަދި މަޖިލިސްގައި ނެގުނު ވޯޓުތަކާއި މި ހުރިހާ ކަމަކަށް އެމްއެމްޕީއާރުސީގެ ފައިސާ ވަނީ ބޭނުންކޮށްފައި ކަމަށް އަދީބު ވިދާޅުވި އެވެ.
އެކަމާއި ގުޅިގެން ހަސަން ލަތީފް ކުރެއްވި ޓްވީޓެއްގައި ވިދާޅުވީ އެމްއެމްޕީއާރްސީ ފައިސާގެ ބައިކުޅަ ބައި ލިބުނު މިނިސްޓަރުންނާއި މަޖިލިސް މެންބަރުންނާއި އެނޫންވެސް މީހުންގެ ނަންތައް އާއްމުކޮށް، ޝަރީއަތްކޮށް އިންސާފު ގާއިމްވާން ޖެހޭ ކަމަށެވެ.
“އެކަން ނުކުރާހާ ހިނދަކު ވައްކަން ފޮރުވަން އުޅޭ ކަމުގެ އިލްޒާމް އެޅޭނެ. އެ ބަނދުނާމު އެޅޭކަށް އެމްޑީޕީން ބޭނުމެއް ނޫން.” ހަސަން ލަތީފް ވިދާޅުވިއެވެ.
#MMPRC ge faisa in baikulha bai libifai thibi Ministarunna, Majlis Membarunna enoonves meehunge nanthah haamakoh Shareeaiy koh insaf gaaim vaan jehey. Ekan nukuraahaa hindhaku vakkan foruvan ulhey kamuge ilzam elheyne. E badhunaamu elheykah gaimuves @MDPSecretariat beynumeh noon
— Hassan Latheef???? (@HassanLatheef) September 30, 2020
އެމްއެމްޕީއާރުސީގެ ކޮރަޕްޝަނުގެ މައްސަލައާ ގުޅިގެން ދައުލަތުން އަދީބުގެ މައްޗަށް އުފުލި ހަތް ދައުވާއަށް އިއުތިރާފުވެ، އޭނާ ވަނީ އެކަމަށް ރައްޔިތުންގެ އަރިހުން މާފަށް ވެސް އެދިފައެވެ.