ތަކުރާރުކޮށް ދަންނަވަން، އެމްއެމްޕީއާރުސީގެ ފައިސާ ލިބިފައެއް ނުވޭ: ނަޝީދު

އެމްއެމްޕީއާރްސީގެ ހިޔާނާތުގެ ފައިސާ ލިބިވަޑައިގެންފައި ނުވާ ކަމަށް ރައްޔިތުންގެ މަޖިލީހުގެ ރައީސް، މުހައްމަދު ނަޝީދު ވިދާޅުވެއްޖެއެވެ.

ނަޝީދު މިހެން ވިދާޅުވެފައިމިވަނީ އެމްއެމްޕީއާރްސީގެ ހިޔާނާތުގެ ފައިސާ ކުރީގެ ރައީސުންނާއި ހުރިހާ ސިޔާސީ ޕާޓީތަކަށާއި މަޖިލިސް މެމްބަރުންނަށް ވެސް ލިބިފައިވާނެ ކަމަށް ކުރީގެ ނައިބު ރައީސް އަހުމަދު އަދީބު ވިދާޅުވުމާ ގުޅިގެންނެވެ.

އެކަމާ ގުޅިގެން ނަޝީދު މިއަދު ކުރެއްވި ޓްވީޓެއްގައި ވިދާޅުވީ އެމްއެމްޕީއާރުސީގެ ފައިސާ އެމަނިކުފާނަށް ލިބިވަޑައިގެންފައި ނުވާ ކަމަށް ތަކުރާރުކޮށް ދަންނަވާ ކަމަށެވެ.

Alhugandu thakuraakoh dhannvan. MMPRC ge faisaa alhugandah libifaeh nuvey https://t.co/dcNOpZ4EI4

— Mohamed Nasheed (@MohamedNasheed) October 1, 2020

ޝަރީއަތުގައި ވާހަކަ ދައްކަވަމުން އަދީބު ވިދާޅުވީ އޭނާވެސް އިސްތިސްނާނުވާ ގޮތަށް މި ހިޔާނާތުގައި ޝާމިލުވާ އެންމެން އިންސާފުގެ ކުރި މައްޗަށް ގެނެސް އަދަބު ދޭންޖެހޭ ކަމަށާއި އެގޮތުން އެ ފައިސާގެ މަންފާ ކުރީގެ ރައީސުންނަށާއި، މަޖިލީސް މެމްބަރުންނަށާއި، މިނިވަން މުއައްސަސާތަކުގެ ވެރިންނަށާއި އަދި ސިޔާސީ ހުރިހާ ޕާޓީތަކަށްވެސް ލިބުނު ކަމަށެވެ.