ޕީޕީއެމްގެ ކައުންސިލަރުން ސަސްޕެންޑު ކުރަނީ ސަރުކާރު ފެއިލްވުމުން ކަމަށް އިދިކޮޅު ޕީއެންސީގެ ނައިބު ރައީސް އިބްރާހިމް ޝުޖާއު ވިދާޅުވެއްޖެއެވެ.
ޝުޖާއު މިހެން ވިދާޅުވީ ޕީޕީއެމްއަށްށ ނިސްބަތްވާ ހއ. އުތީމު ކައުންސިލްގެ ރައީސް އަބްދުﷲ ރަޝީދު ވަކި މުއްދަތެއް ނެތް ގޮތަށް ސަސްޕެންޑް ކުރަން ލޯކަލް ގަވަމެންޓް އޮތޯރިޓީ (އެލްޖީއޭ) އިން ނިންމުމާ ގުޅިގެންނެވެ.
އެކަމާ ގުޅިގެން ޝުޖާއު ވިދާޅުވީ އުތީމު ކައުންސިލްގެ ރައީސް އަބްދުﷲ ރަޝީދު ސަސްޕެންޑު ކުރުމަކީ ސަރުކާރުން ހިންގި ފިނޑި އަމަލެއް ކަމަށާއި ޕީޕީއެމްގެ ކެންޑިޑޭޓުން މިގޮތަށް ސަސްޕެންޑުކޮށް، ބިރު ދައްކައިގެން ކައުންސިލު އިންތިހާބު ކާމިޔާބު ކުރުމަށް އެމްޑީޕީން މަސައްކަތް ކުރަނީ މި ސަރުކާރު ފެއިލްވެ، ތާއީދު ނެތުމުން ކަމަށެވެ.
އަދި މިކަންތައް ކުއްވެރި ކުރާކަމައްވެސް ސުޖާއު ވިދާޅުވިއެވެ.
އެލްޖީއޭ އިން އަބްދުﷲ ރަޝީދު ސަސްޕެންޑުކުރީ މުއްދަތެއް ނެތް ގޮތަށެވެ. އޭނާ ސަސްޕެންޑުކުރީ އެ އޮތޯރިޓީ އަށް ހުށަހެޅިފައިވާ 11 މައްސަލަ ބަލައި ނިމެންދެންނެވެ.
އެ މައްސަލަތަކުގެ ތެރޭގައި ގަވާއިދާ ހިލާފަށް މުވައްޒަފުން ނެގުމާއި، މާލިއްޔަތު ގަވާއިދާއި ހިލާފަށް ކަންކަން ކޮށްފައިވުމާއި، ކައުންސިލަށް ލިބޭ ފައިސާގެ އެހީތަކުގެ ރިކޯޑެއް ބަލަހައްޓާފައި ނުވުމުގެ މައްސަލަ ހިމެނެއެވެ..