ހޯމް މިނިސްޓަރ އިމްރާން ޢަބްދުﷲގެ އިތުބާރު ނެތްކަމުގެ މައްސަލަ މާދަމާ ބާއްވާ ރައްޔިތުންގެ މަޖިލީހުގެ ޖަލްސާއަށް އެޖެންޑާކޮށްފިއެވެ.
އިމްރާންގެ އިތުބާރު ނެތްކަމުގެ މައްސަލަ މަޖިލީހަށް ހުށަހެޅީ އިދިކޮޅު ޕީޕީއެމް/ޕީއެންސީން އިސްނަގައިގެންނެވެ.އެގޮތުން މި މައްސަލަ މަޖިލީހަށް ވެއްދީ 11 މެމްބަރުންގެ ސޮޔާއެކުއެވެ.
މިމައްސަލަ މިހާތަނަށް އެޖެންޑާކޮށްފައި ނުވަނީ މަޖިލީހުގައި ބަޖެޓް ބަހުސް ކުރިއަށްދާތީއެވެ. ނަމަވެސް ބަޖެޓް ބަހުސް ނިމުމުން މިމައްސަލަ މަޖިލީހުގައި އެޖެންޑާކުރައްވާނެކަމަށް މަޖިލީހުގެ ރައީސް މުހައްމަދު ނަޝީދު ވަނީ ވިދާޅުވެފައެވެ.
މި މައްސަލަ މާދަމާ އަށް އެޖެންޑާކޮށްފައިވާއިރު، އެ މައްސަލަ އަށް ތާއީދު ނުކުރަން މަޖިލީހުގެ ސުޕަރ މެޖޯރިޓީ އޮތް އެމްޑީޕީގެ ޕާލަމެންޓްރީ ގްރޫޕްގެ އިއްތިފާގުން މިއަދު ވަނީ ފާސްކޮށްފައެވެ.
އިމްރާންގެ އިތުބާރު ނެތްކަމުގެ މައްސަލައިގެ ބަހުސަށް ދެ ގަޑިއިރު އާންމު ކޮމިޓީން ވަނީ ކަނޑައަޅާފައެވެ. އެގޮތުން މިނިސްޓަރު އިމްރާނަށް ފަށާއިރުއާއި މެދުތެރެއިން އަދި ނިންމާއިރު 10 މިނެޓް ލިބިވަޑައިގަންނަވާނެއެވެ.
advertisment