އައްޑޫ ފްލައިން ސްކޫލްގެ ދަރިވަރުންގެ މެދުގައި ހުރި ކަންބޮޑުވުންތަކާއި ގުޅޭގޮތުން ރައްޔިތުންގެ މަޖިލީހަށް ސިޓީ ލިޔުއްވުމަށް ރައީސް މުހައްމަދު ނަޝީދު އެދިވަޑައިގެންފިއެވެ.
“އާސްކް ސްޕީކާ” ޕްރޮގްރާމްގައި ފްލައިން ސްކޫލްގައި ކިޔަވާ ދަރިވަރަކު ކުރި ސުވާލެއްގައި ވަނީ ސްކޫލްގެ މިހާރުގެ ހާލަތާއި، ކަމާބެހޭ އިދާރާތަކުން ފްލައިން ސްކޫލްގައި ހުރި މައްސަލަތަކާ ގުޅޭގޮތުން ނޫސްބަޔާނެއް ނެރުނު ނަމަވެސް އެދެވޭ ފިޔަވަޅެއް އެޅިފައި ނުވާތީ މަޖިލީހުން އިސްނަގައިގެން މި މައްސަލަ ބަލައިދޭން އެދިފައެވެ.
“ރައްޔިތުންގެ މަޖިލީހުގެ މުއައްސަސާއަކީ ވަކި މުއައްސަސާއެއް. ރައްޔިތުންގެ މަޖިލީހަށް ހުށަހެޅޭ ސިޓީތަކާއި އަދި ހުށަހެޅޭ ކަންކަން ވެސް އިރާދަކުރެއްވިއްޔާ މަޖިލީހުން ބަލާނެ. އަޅުގަނޑުމެން އެކަމާ އުޅޭނަން” ރައީސް ނަޝީދު ވިދާޅުވިއެވެ.
އައްޑޫ ފްލައިން ސްކޫލުން ހަޔާރ އެޑިއުކޭޝަން މިނިސްޓްރީގެ ގިނަ އެނގުންތަކަށް މިހާތަނަށް ބޯލަނބާފައި ނުވެއެެވެ. އެގޮތުން ދަރިވަރުންގެ ކޯސް ކުރިއަށް ގެންދާނެ ގޮތުގެ ޕްލޭނެއް ހެދުމާއި، އިތުރަށް މިނިސްޓްރީގެ ހުއްދަ ނެތި ދަރިވަރުން ނުނެގުމަށް އަންގާފައިވާ އެންގުމަށް ވެސް ބޯލަނބާފައި ނުވެއެވެ.
ފްލައިން ސްކޫލުގެ މައްސަލަތައް ބޮޑުވެފައިވާއިރު، އެތަނަށް ފިޔަވަޅު އަޅުއްވާނެކަމުގެ އިންޒާރު ޓްރާންސްޕޯޓު މިނިސްޓަރ އައިޝަތު ނަހުލާވެސް ވަނީ ދެއްވާފައެވެ.