އޭޑީކޭ އާއި ލަކްސް ރިސޯޓްސް އަދި ޓީއެމްއޭ ގުޅިގެން ވެލާނާ އިންޓަނޭޝަނަލް އެއާޕޯޓް (ވީއައިއޭ)ގައި ކޮވިޑް ޓެސްޓަށް ހާއްސަކޮށްގެން ލެބޯޓަރީއެއް އިއްޔެ ހުޅުވައިފި އެވެ.
ލަކްސް ރިސޯޓްސް، ޓީއެމްއޭ އަދި އޭޑީކޭ ގުޅުގެން ވީއައިއޭގައި ކޮވިޑް-19 ޕީސީއާރު ޓެސްޓު ހަދާ ޒަމާނީ ލެބެއް ހުޅުވާފައިވަނީ ބުދަ ދުވަހު ކަމަށް އޭޑީކޭ އިން ބުނެއެވެ.
މި ލެބޯޓްރީ ހުޅުއްވާދެއްވީ ވާޗުއަލް ހަފްލާއެއްގައި މިނިސްޓަރ އޮފް ޓޫރިޒަމް ޑރ. އަބްދު ﷲ މައުސޫމް އެވެ.
އޭޑީކޭ އިން ބުނީ ވީއައިއޭގައި ހުޅުވި ލެބްގެ ސަބަބުން ޕީސީއާރު ޓެސްޓް ހެދުމުގައި ފަސޭހަތަކެއް ލިބޭނެ ކަމަށެވެ. ޓީއެމްއޭގައި ހުންނަ ލެބުން ސާމްޕަލް ނެގުމުގެ އިތުރުން ރިސޯޓުތަކުންނާއި ރަށްރަށުން ގެންނަ ސާމްޕަލް ވެސް އެއާޕޯޓްގެ ލެބޯޓަރީއަށް ބަލައިގަންނާނެ ކަމަށް، އޭޑީކޭ އިން ބުންޏެވެ.
މިބަދަލާއެކު އޭޑީކޭއިން ޕީސީއާރު ޓެސްޓު ހަދައިދޭ އަގު ކުޑަކޮށްފައިވާނެ ކަމަށް އެ ހޮސްޕިޓަލުން ބުނެއެވެ. އެގޮތުން މިހާރު އެ ހޮސްޕިޓަލުން ދިވެހީންނަށް ޓެސްޓް ހަދައިދޭ އަގު، 1200 ރުފިޔާއިން 1000 ރުފިޔާއަށް ކުޑަކޮށްފައިވާނެ ކަމަށް އޭޑީކޭއިން ބުނެއެވެ. އަދި ފަތުރުވެރިންނަށް ޓެސްޓް ހަދައިދޭ އަގު 80 އެމެރިކާ ޑޮލަރުން 70 އެމެރިކާ ޑޮލަރަށް ކުޑަކޮށްފައިވާނެ ކަމަށް އޭޑީކޭއިން ބުނެއެވެ.