މައްސަލަ ޖުމެއިރާގެ ފަރާތުން ހައިކޯޓަށް ހުށަހެޅުމުން އެ ކޯޓުން ނިންމާފައިވަނީ އާބިޓްރޭޝަންގައި ހިނގާ މައްސަލައިގައި ވަކި ގޮތެއް ނިމެންދެން ރިސޯޓު ހިންގުމުގެ ހައްގު ޖުމެއިރާއަށް ގެއްލޭނެ ފަދަ އެއްވެސް ފިޔަވަޅެއް ނޭޅުމަށެވެ. އަދި އެ ހުކުމުގައި ވަނީ އެއްބަސްވުން ބާތިލު ކުރުމުގެ ކުރިން އޮތް ހާލަތު ދެމެހެއްޓުމަށް ބުނެފައެވެ.
އެސްޕީއެޗް ކުންފުނީގެ ޑިރެކްޓަރުންގެ ބޯޑުގައި ކުރީގެ ފޮރިން މިނިސްޓަރު ދުންޔާ މައުމޫންގެ ފިރިކަލުން ޝުއައިބު މުހައްމަދު ޝާހު ހިމެނެއެވެ.
އާބިޓްރޭޝަންގައި ހިނގަމުންދާ މައްސަލަތަކާ ގުޅިގެން ވަގުތީ ފިޔަވަޅު އެޅުމުގެ ބާރު ކޯޓުތަކަށް ލިބިގެންވާ ކަމަށް އާބިޓްރޭޝަންގެ ގާނޫނުގައި ބަޔާންކޮށްފައިވާއިރު، ހައިކޯޓުގެ އިސްތިއުނާފު ސުޕްރީމް ކޯޓަށް ހުށަހަޅާފައިވަނީ އެސްޕީއެޗްއިންނެވެ. އަދި ހައިކޯޓުގެ އަމުރު ތަންފީޒު ކުރުމަށް ސިވިލް ކޯޓަށް ހުށަހެޅީ ޖުމެއިރާއިންނެވެ. އެސްޕީއެޗްއިން އެދިފައިވަނީ ސުޕްރީމް ކޯޓުން މައްސަލަ ނިމެންދެން ހައި ކޯޓުގެ އަމުރު ތަންފީޒު ކުރުން މަޑުޖައްސާލަން އަންގާ އަމުރެއް ނެރެ ދިނުމަށެވެ.
މައްސަލައިގައި ސުޕްރީމް ކޯޓުން ނެރުނު އަމުރުގައި ބުނެފައިވަނީ، އެ މައްސަލާގައި އެންމެ އަދުލުވެރި ގޮތަކީ ސުޕްރީމް ކޯޓުން މައްސަލަ ނިމެންދެން ހައި ކޯޓުގެ އަމުރު ތަންފީޒު ކުރުން މަޑުޖައްސާލުން ކަމަށެވެ. އަމުރު ތަންފީޒު ކުރުމުގެ ގޮތުން މިވަގުތު އެއްވެސް ކަމެއް ނުކުރަން އަންގާ ކަމަށް ވެސް ސުޕްރީމް ކޯޓުން ވަނީ އަންގާފައެވެ.
advertisment