ޓެރަރިޒަމްގެ ތުހުމަތަށް ހައްޔަރުކުރި މީހާއަކީ މާލެއިން އެ ގައުމަށް ފުރަންގޮސް ވެލާނާ އިންޓަނޭޝަނަލް އެއާޕޯޓުގައި “ބޮމެއް” އޮތްކަމަސް ބުނެ ވާހަކަ ދެއްކި މީހެއްކަމަށް ފުލުހުން ބުނެފިއެވެ.
ޓެރަރިޒަމްގެ ތުހުމަތު ކުރެވޭ މީހަކު ހައްޔަރުކޮށްފައިވާކަމަށް ބުނެ މީޑިއާތަކުގައި ފެތުރެން ފެށުމުން، ނޫސްވެރިން ވަނީ އެކަމުގެ ހަގީގަތް ސާފުކޮށްދިނުމަށް އެދިފައެވެ.
މައްސަލައިގައި ފުލުހުން ބުނެފައިވަނީ އެ މީހާއަކީ ޑިސެމްބަރުގެ 29 ގެ މެންދުރު، 13:30 އެހާކަށްހާއިރު މާލެ އިން ފުރަން ގޮސް އެއާޕޯޓްގައި ހުރި އުމުރުން 28 އަހަރުގެ އިންޑިއާ މީހެއް ކަމަށެވެ. އަދި އޭނާ ވަނީ “ބޮމެކ”ޭ ބުނެ ވާހަކަ ދައްކާފައިކަމަސް ފުލުހުން މައުލޫމާތު ދިނެވެ.
އެ އަމަލުގެ ސަބަބުން އޭނާ ފުލުހުންގެ ބެލުމުގެ ދަށަށް ގެނެވުނުކަމަށާއި އޭނާގެ ބަންދާއި މެދު ގޮތެއް ނިންމަން ކޯޓަށް ހާޒިރު ކުރުމުން ކޯޓުން ވަނީ މިނިސްޓްރީ އޮފް ހޯމް އެފެއާޒް އިން ކަނޑައަޅާ ތަނެއްގައި ބަންދުކޮށް ތަހުގީގު ކުރުމަށް 5 ދުވަސް ދީފައި ކަމަށް ފުލުހުން ބުންޏެވެ.
ކޯޓު އަމުރުގައި ބުނެފައިވަނީ މައްސަލައިގެ ބާވަތަށް ބަލައި އެކަށީގެންވާ ހެކި ހުށަހަޅާފައި ވުމާއި އެކު އެމީހާ އަކީ ބިދޭސީއަކަށްވެފައި ފިލާފާނެ ކަމަށް ބަންދުގައި ބަހައްޓައިގެން މައްސަލަ ތަހުގީގު ކުރުމަށް ފަސް ދުވަހުގެ މުއްދަތެއް ދޭ ކަމަށެވެ.
މައުލޫމާތު ލިބޭ ގޮތުން އެއާޕޯޓުގައި އޭނާ އެގޮތަށް ވާހަކަ ދައްކައި ހެދުމުން، ސެކިއުރިޓީން ވަނީ ބަލާ ފާސްކުރުމަށް މަސައްކަތްކޮށްފައެވެ. އެހެން ނަމަވެސް އޭނާ އެކަމަށް ދެކޮޅު ހަދާ، އެއާޕޯޓުގައި އަޑުގަދަކޮށްފައިވާ ކަމަށް ވަނީ އެނގިފައެވެ.
advertisment