ފާރިސްއާއި ދެކޮޅަށް ހެކި ހުށަހަޅުއްވައި ދިޔާނާ ވިދާޅުވީ، ފުލުހުންގެ ތަހުގީގަށް ބަޔާން ދެއްވައި، މިވަގުތަށް ބޭނުންވާ ހެކި ހުށަހަޅުއްވާފައިވާ ކަމަށެވެ. ދިޔާނާ ވިދާޅުވީ ދެ އަހަރު ދުވަހު ހަނު ހުރެވިއްޖެ ކަމަށާއި، ސިޔާސީ ޕާޓީތަކުން ސުލްހަވެރިކަމާއި އެކު މިކަން ހައްލުކޮށްދޭން އެދޭ ކަމަށެވެ.
ތަކުރާރުކޮށްް ފައިސާއާއި ހަވާލުވިކަމަށް ރައީސް މައުމޫނާއި، ފާރިސް އިންކާރު ކުރައްވާތީ، މައްސަލަ ފުލުހަށް ހުށަހެޅުން ނޫން އިތުރު ގޮތެއް ނެތީކަމަށް ދިޔާނާ ވިދާޅުވިއެވެ.
ސިޔާސީ މަސައްކަތަށް ކަމަށް ވިދާޅުވެ، ރައީސް މައުމޫން އެ ކަމަނާގެ ފިރިކަލުން ޖާބިރު އަތްޕުޅުން ނެންގެވި 29 މިލިއަން ރުފިޔާގެ ބޮޑު ބައެއް ރައީސް މައުމޫނާ ހަވާލު ކުރަން ޖާބިރު ދެއްވީ ފާރިސްއަށް ކަމަށް ދިޔާނާ ވިދާޅުވިއެވެ. އެ ގޮތުން، 29 މިލިއަން ރުފިޔާގެ ތެރެއިން 24 މިލިއަން ރުފިޔާ މައުމޫން ވިދާޅު ވެގެން ދަރިކަލުން ފާރިސްއާ ހެކި ހިމެނޭ ގޮތަށް ހަވާލު ކުރި އެވެ. އެ ފައިސާ ހަވާލު ކުރުމުގެ ކުރިން މެލޭޝިއާގައި މައުމޫނާއި ފާރިސް އެ ފައިސާ ހޯއްދެވުމަށް ޖާބިރާއެކު ބޭއްވި ބައްދަލުވުމުގައި ދިޔާނާ ވެސް އިންނެވި ކަމަށާއި ގެރެންޓީއެއްގެ ގޮތުގައި މައުމޫނުގެ ގެކޮޅު މއ. ކިނބިގަސްދޮށުގޭގެ ރަޖިސްޓަރީ ދެއްވަން ރައީސް މައުމޫން ހުށަހެޅުއްވި ކަމަށް ދިޔާނާ ވިދާޅުވި އެވެ.
ރައީސް މައުމޫން، ޖާބިރު އަތުން ނެންގެވިކަމަށް ބުނާ 29 މިލިއަން ރުފިޔާއާއި ގުޅޭގޮތުން ހެއްކެއްގެ ގޮތުގައި ލިޔެކިޔުމުގެ އެއްބަސްވުމެއްގައި ސޮއިކުރެވިފައެއް ނެތެވެ. އެފަދަ ލިޔެކިޔުމެއް ފެންނަން ނެތް ނަމަވެސް، ޖާބިރު ވަނީ މުއާމަލާތް ހިންގާފައިވަނީ އެތައް ބައެއްގެ ހާޒިރުގައިކަން ވަނީ ފާހަގަކުރައްވާފައެވެ.
ސިވިލް ކޯޓަށް ހުށަހެޅި މައްސަލައިގައި ޖާބިރު، ފައިސާގެ މުވާމަލާތެއް ހިނގާފައިވާކަން ސާބިތު ކުރުމަށްޓަކައި އެކަމުގެ ހެކީންގެ ގޮތުގައި ރައީސް އިބްރާހިމް މުހައްމަދު ސޯލިހާއިއި، ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު އާއި، ޖާބިރުގެ އަނބިކަބަލުން ދިޔާނާ ސައީދު އަދި އެއްބަނޑު އެއްބަފާ ދައްތަ މަރިޔަމް ޝަބީބާގެ ނަން ހުށަހެޅުވި އެވެ.
މި ނަންތައް ހުށަހަޅުއްވާ ޖާބިރު ވިދާޅުވީ، ރައީސް މައުމޫން އެއްވެސް އިރެއްގައި ހެކިންނާއި ގުޅޭގޮތުން އޭނާ ދެއްކެވި ވާހަކައެއް އިންކާރު ކުރައްވާފައި ނުވާ ކަމަށެވެ. އަދި ލިއުމަކުން އެއްބަސްވުމެއް ނެތުމުން ފައިސާ އަނބުރާ ދައްކަން ޖެހިވަޑައިނުގަންނަވާނެ ކަމަށް މައުމޫން ގަބޫލުފުޅު ކުރެއްވިޔަސް ހެކިންގެ ހެކިބަހުން އެކަން ސާބިތުވާނެ ކަމަށް ޖާބިރުގެ މައްސަލާގައިވެ އެވެ.
ޖާބިރު ވިދާޅުވީ، ރިޔާސީ އިންތިޚާބުގެ ތެރޭގައި 29 މިލިއަން ރުފިޔާ މައުމޫނަށް ދެއްވީ ލޯނެއްގެ ގޮތުގައި އަނބުރާ ދައްކަވާ ގޮތަށް އިންޓަރެސްޓް ވެސް އަރާ ގޮތަށް ކަމަށެވެ. ފައިސާ ދިނުމާ ގުޅޭ މަޝްވަރާތައް ބޭއްވީ މެލޭޝިއާގެ ވެރިރަށް ކުއާލަލަމްޕޫރުގައި ހުންނަ ހޮޓެލްއެއްގައި ބޭއްވި ބައްދަލުވުމެއްގެ ތެރެއިންކަމަށް ވެސް ޖާބިރު ވިދާޅިވިއެވެ.