ވެކްސިންއާ ގުޅޭގޮތުން އިދިކޮޅު ފަރާތްތަކުން ފަތުރަމުން އަންނަ ވާހަކަތަކަށް ވިލިމާލެ ދާއިރާގެ މެމްބަރު އަހުމަދު އުޝާން ރައްދުދެއްވައިފިއެވެ.
ކޮވިޑް-19 އިން ރައްކާތެރިވުމަށް ގެނެސްފައިވާ ވެކްސިން ޖެހުމުގެ މަސައްކަތް އިއްޔެ ފަށާފައިވާއިރު، އިއްޔެ ވަނީ ސަރުކާރުގެ އިސްފަރާތްތަކާއި ސިއްހީ ހިދުމަތްތެރިންގެ އިތުރުން އެކި ދާއިރާތަކުގެ ފަރާތްތަކުން ވެކްސިން ޖަހާފައެވެ. އެހެންނަމަވެސް އިދިކޮޅު ޕީޕީއެމްއަށް ނިސްބަތްވާ ފަރާތްތަކުން ސޯޝަލްމީޑިއާގައި އަންނަނީ ވެކްސިނާއި ގުޅުވާ ސުވާލު އުފައްދާ އެކި ގޮތްގޮތަށް ވާހަކަ ދައްކަމުންނެވެ.
މިކަމާ ގުޅިގެން އުޝާމް ކުރެއްވި ޓްވީޓެއްގައި ވިދާޅުވީ ވެކްސިންއާ ގުޅޭގޮތުން ސާބިތުނުހިފޭ ދޮގުވާހަކަތައް ފަތުރައި ރައްޔިތުންގެ ހިތުގައި ޝައްކާއި ބިރުވެރިކަން ފެތުރުން ހުއްޓާލަން ޖެހޭ ކަމަށާއި ކޮންމެ ކަމަކީ ސިޔާސީ ކަމަކަށް ހަދާކަށް ނުޖެހޭ ކަމަށެވެ.
“މިއީ ދެން ކިހާ ދެރަކަމެއް. ވެކްސިން ޖަހަން ބޭނުންނުވާނަމަ ނުޖެހީމަ ރަގަޅުވާނެ.” އުޝާމް ވިދާޅުވިއެވެ.
މިއީ ދެން ކިހާ ދެރަކަމެއް. ވެކްސިން ޖަހަން ބޭނުންނުވާނަމަ ނުޖެހީމަ ރަގަޅުވާނެ. ވެކްސިންއާ ގުޅޭގޮތުން ސާބިތުނުހިފޭ ދޮގުވާހަކަތައް ފަތުރައި ރައްޔިތުންގެ ހިތުގައި ޝައްކާއި ބިރުވެރިކަން ފެތުރުން ހުއްޓާލަންވެއްޖެ. ކޮންމެ ކަމަކީ ސިޔާސީ ކަމަކަށް ހަދާކަށް ނުޖެހޭ. https://t.co/jP8LP7dACB
— Ahmed Usham (@a_usham) February 2, 2021
ބްރޯޑްކޮމް އިން ރޭ ނެރުނު ބަޔާނެއްގައި ބުނީ ރާއްޖޭގައި ކޮވިޑް-19 ވެކްސިން ޖަހަން ފެށުމާ ގުޅިގެން، އެކަމާ ގުޅޭ މަޢުލޫމާތު ބްރޯޑްކާސްޓްކުރުމުގައި ޢާންމުންގެ މެދުގައި ހާސްކަމާއި ނުތަނަވަސްކަން އުފެދޭ ގޮތަށް ސާބިތު ނުހިފޭ މަޢުލޫމާތު ގެނެސްދިނުމުން އެއްކިބާވުމަށާއި، މިކަމާ ގުޅޭ އެންމެހައި ކޮންޓެންޓް ގެނެސްދިނުމުގައި ޒިންމާދާރު ނޫސްވެރިކަން ކުރިއަށް ނެރުމަށް އިލްތިމާސްކުރާ ކަމަށެވެ.