އިންޑިއާ އާއި ޗައިނާ އިން ރާއްޖެއަށް އެހީވަނީ ވާދައަށް ނޫން ކަމަށް ފޮރިން މިނިސްޓަރު އަބްދުﷲ ޝާހިދު ވިދާޅުވެއްޖެއެވެ.
ޕީއެސްއެމް ބުރާސްފަތި ދުވަހު ކުރިއަށް ގެންދިޔަ ރިޔާސީ ބަޔާނުގެ ކަވަރޭޖްއަށް މިނިސްޓަރު ޝާހިދު ދެއްވި ހާއްސަ އިންޓަވިއުއެއްގައި ވިދާޅުވީ، އެހެން ގައުމުތަކަށް ވުރެ ބޮޑަށް ސަރުކާރުން އިންޑިއާގެ މަސްލަހަތަށް އިސްކަންދޭ ކަމަށް ބުނާ ދައްކަނީ ހަގީގަތާ ހިލާފު ވާހަކަތަކެއް ކަމަށެވެ.
އެގޮތުން ޝާހިދު ވިދާޅުވީ އިންޑިއާ އިން ރާއްޖެ އަށް ކޮވިޑް-19 ގެ ވެކްސިން ހަދިޔާކުރުމުން ޗައިނާ އިން ރާއްޖެ އަށް ވެކްސިން ނުދިން ކަމަށާއި އެގޮތަށް ނިންމީ މި ސަރުކާރުން ޗައިނާއާއެކު ބާއްވާ ގުޅުން ގޯސްވުމުން ކަމަށް ބުނެ އިދިކޮޅު ފަރާތްތަކުން ވާހަކަދައްކަމުންދިޔަ ކަމަށެވެ.
އެކަމަކު ޗައިނާއިން ހަމަ އިންޑިއާ އިން ދިން އަދަަަދަށް ވެކްސިންގެ ޑޯޒް ދޭން ނިންމާފައިވާކަން ހާމަކުރަައްވަމުން ޝާހިދު ވަނީ ޑިޕްލެމެޓިކް ދާއިރާގެ ކަންތައް ހިނގާއިރު ވަގުތުވެސް ނަގާނެ ކަމަށާއި އަދި ކަންކަން ހަމަޖެހިގެންދާ އުސޫލުތަކެއް އޮންނާނެ ކަމަށް ވިދާޅުވެފައެވެ.
މިފަދައިން ކަން ހިނގަމުން އަންނައިރު، ސިޔާސީ، ވަގުތީ މަންފާއެއް ހޯދުމަށް ވަކި ގައުމަކާ ދިމާއަށް އެއްޗެހި ގޮވާ ހެދުމަކީ ރަނގަޅުކަމެއް ނޫން ކަމަށާއި އެއީ ތަހުޒީބީ ކަމެއްނޫން ކަމަށް މިނިސްޓަރު ވިދާޅުވިއެވެ.
ޝާހިދު ވިދާޅުވީ އިންޑިއާ އާއި ޗައިނާ އިން ރާއްޖެ އަށް އެހީވަނީ ދިވެހި ރައްޔިތުން ދެކެ ވާ ލޯބިން ކަމަށާއި އެހެންކަމުން އެ ލޯބި އަނބުރާ އެ ގައުމުތަކަށް ވެސް ދޭންޖެހޭނެ ކަމަށެވެ.
advertisment