މާލެސިޓީ އޮތީ ލޮކްޑައުންއަކަށް ދާ ހާލަތުގައި ކަމަށް ހެލްތް މިނިސްޓަރު އަހުމަދު ނަސީމު ވިދާޅުވެއްޖެއެވެ.
ޓުއާ އެޖެންސީތަކާއި ޓުއާ އޮޕަރޭޓަރުންގެ ޚާއްސަ ގާނޫނު އެކުލާވާލުމަށް މަޖިލީހުގައި މިއަދު ކުރިއަށް ދިޔަ މަސައްކަތު ބައްދަލުވުމުގައި މިނިސްޓަރު ނަސމް ވިދާޅުވީ މާލޭގެ ހާލަތު ފުރަބަންދު ކުރަން ޖެހޭ ހާލަތެއްގައި އޮތް ނަމަވެސް ވީހާވެސް ބޮޑަކަށް މަސައްކަތް ކުރަމުން ދަނީ ފުރަބަންދަކަށް ނުގޮސް ހިފެހެއްޓުމަށް ކަމަށެވެ.
ރާއްޖޭގެ އިގްތިސާދު ބިނާވެފައި އޮންނަނީ ޓޫރިޒަމްއަށް ކަމަށްވާ އިރު، ފުރަބަންދަކަށް ދިއުމުގެ ގާބިލުކަން ނެތް ކަމަށް މިނިސްޓަރު ނަސީމް ވިދާޅުވިއެވެ. އެކަމަކު އަތޮޅުތެރޭގައި އަދި ރިސޯޓުތަކުގެ ހާލަތަށްވުރެ މާލޭގެ ހާލަތު ކަންބޮޑުވާ ވަރަށް ގޯސްވެފައިވާ ކަމަށް ނަސީމް ވިދާޅުވިއެވެ.
މިނިސްޓަރު ނަސީމް ވިދާޅުވީ ކޮވިޑް-19 އަކީ އާދައިގެ ރޯގާއެއްގެ ގޮތުގައި ދެކުމަކީ ވަރަށް ދެރަކަމެއް ކަމަށާއި، މިއީ އާދައިގެ ބައްޔެއް ނޫންކަމަށެވެ. މި ބައްޔަކީ ސީރިއަސް ބައްޔެއްކަން ފާހަގަކޮށް މިނިސްޓަރު ވިދާޅުވީ ބަލި ކޮންޓްރޯލް ކުރެވޭނީ އެންމެން އެކުގައި ކުރާ މަސައްކަތުން ކަމަށެވެ. އަދި ވިދާޅުވީ ކޮންޓެކްޓް ޓްރޭސިން ހެދުމަށް މަސައްކަތްކުރާ ކުދިންގެ ތެރެއިންވެސް 23 ކުދިން މިހާތަނަށް ޕޮޒިޓިވްވެފައިވާ ކަމަށެވެ.
މީގެ އިތުރުން މިނިސްޓަރު ނަސީމް ވިދާޅުވީ ލޮކްޑައުނަކަށް ދެވެން ނެތްނަމަވެސް އިތުރު ފިޔަވަޅުތައް އަޅާނެ ކަމަށާއި، އިތުރު ފިޔަވަޅުތައް އަޅަންޖެހޭ ކަމަށެވެ.
advertisment