ޖިންސީ ގޯނާގެ ތުހުމަތުގައި ޓޫރިޒަމް މިނިސްޓަރުގެ މަގާމުން ވަކިކުރި އަލީ ވަހީދުގެ ޕާސްޕޯޓު ދޫކޮށްލުމަށް، ކްރިމިނަލް ކޯޓުން ކުރި އަމުރުގެ އިސްތިއުނާފީ މައްސަލަ ބަލައިނުގަންނަން ހައިކޯޓުގެ ރެޖިސްޓްރާ ނިންމަވައިފި އެވެ.
ހައިކޯޓުގެ މީޑިއާ އޮފިޝަލް ވިދާޅުވީ، މައްސަލަ ބަލައިނުގަތުމަށް ރެޖިސްޓްރާ ނިންމެވީ އަމުރު ދޫކުރިކަމަށް މައުލޫމާތު ލިބުނު ވަގުތަށްވުރެ 48 ގަޑިއިރު ފަހުން ހުށަހަޅާފައިވާތީ ކަމަށެވެ. ނަމަވެސް، ރެޖިސްޓްރާގެ ނިންމުން ހަތް ދުވަހުގެ ތެރޭގައި އިސްތިއުނާފަށް ހުށަހެޅުމުގެ ފުރުސަތު ޕްރޮސެކިއުޓާ ޖެނެރަލްގެ އޮފީސް (ޕީޖީ) އަށް އޮންނާނެ އެވެ.
މިއީ ސިއްހީ މައްސަލަތަކެއް ދިމާވެފައިވާކަމަށް ބުނެ ރާއްޖެއިން ބޭރަށް ދިއުމަށް ހުށަހެޅުމުން، އަލީ ވަހީދުގެ ޕާސްޕޯޓު ދޫކޮށްލި މައްސަލައެކެވެ. އަލީ ވަހީދަކީ ފިލުމުގެ ފުރުސަތު އޮތް މީހެއްކަމުން، އެ ފުރުސަތު ޓްރެވެލް ޑޮކިއުމެންޓެއްގައި ނޫން ގޮތަކަށް ނުދިނުމަށް ދައުލަތުން ހުށަހެޅި ނަމަވެސް ކްރިމިނަލް ކޯޓުގައި މައްސަލަ ބެއްލެވި ގާޒީ ނިންމެވީ މައިބަދައިގެ އޮޕަރޭޝަނަށް އަލީ ވަހީދުގެ ޕާސްޕޯޓު ދޫކުރުމަށެވެ. ބޭނުން ގައުމަށް ދިއުމަށް އަލީ ވަހީދަށް ދިނުމުން، އެނާއާއި އެކު ޖާމިނުވެފައި ވަނީ އަލީ ވަހީދުގެ ގާތް އެކުވެރިޔާ އަދި ޔޫތް މިނިސްޓްރީގެ ސްޓޭޓް މިނިސްޓަރު އައްސަދު އަލީ (އަޑުބަރޭ) އެވެ.
އަލީ ވަހީދުގެ ޕާސްޕޯޓް ދޫކޮށްލި އަމުރުގެ އިސްތިއުނާފް ހައި ކޯޓުން ބޭރުކުރިއިރު މައްސަލަ، ހައި ކޯޓުން ކުރިއަށް ގެންގޮސްފާނެތޯ ސުވާލު އުފެދެ އެވެ. ޖިނާއީ ކުށެއްގެ ތުހުމަތުކުރެވޭ މީހެއްގެ ޣައިރު ހާޒިރުގައި އިސްތިއުނާފް މައްސަލަ ކުރިއަށް ނުގެންދެވޭނެ ކަމަށް ސުޕްރީމް ކޯޓުން ދާދިފަހުން ވަނީ ބުނެފައެވެ. އެ ކޯޓުގެ ތިން ފަނޑިޔާރުންގެ ބެންޗަކުން ބެއްލެވި މައްސަލައެއްގެ ހުކުމުގައި ބުނެފައި ވަނީ އެ މީހެއްގެ ހާޒިރުގައި ޝަރީއަތް ކުރުމަކީ ގާނޫނުއަސާސީގެ 51 ވަނަ މާއްދާގެ (ޅ)ގައި، ކުށެއް ކުރި ކަމުގެ ދައުވާ އުފުލިފައިވާ ކޮންމެ މީހަކަށް ލިބިދީފައިވާ އަސާސީ ހައްގެއް ކަމަށެވެ. އަދި އެ ހައްގު އެއްވެސް މިންވަރަކަށް ހަނިކުރެވޭނީ ގާނޫނުއަސާސީގައި ބުނެފައިވާ އިޖުރާއަތުގެ ތެރެއިން ރައްޔިތުންގެ މަޖިލީހުން ފާސްކުރާ ގާނޫނަކުން ކަމަށް ބުނެފައި ވެއެވެ.
ސުޕްރީމް ކޯޓުގެ އެ ހުކުމަށް ރިއާޔަތްކޮށް ހައި ކޯޓުން ވެސް ވަނީ، ޖިނާއީ ކުށެއްގައި ދައުވާ އުފުލުމަށް ފަހު އެ ދައުވާއާ ގުޅިގެން ނިންމާ ނިންމުމެއްގެ އިސްތިއުނާފީ އަޑުއެހުން، އިސްތިއުނާފު ރައްދުވާ ފަރާތުގެ ޣައިރު ހާޒިރުގައި ކުރިއަށް ނުގެންދެވޭނެ ކަމަށް ބުނެފައެވެ.
މި މައްސަލަ އާއި ގުޅިގެން މަޖިލީހުގެެ ޖުޑިޝަރީ ކޮމެޓީއަށް ހާޒިރުކުރުމުން، ޕީޖީ ހުސެއިން ޝަމީމް ވިދާޅުވީ އަލީ ވަހީދު ރާއްޖެއިން ބޭރަށް ދިޔަ ތާރީހު ޔަގީން ނުވާ ކަމަށެވެ. މިހާތަނަށް ލިބުނު މައުލޫމާތުތަކުން އޭނާ ފުރާފައިވަނީ 09 ގައި ކަމަށް ބެލެވުނަސް، އެކަން ޔަގީން ކުރުމަށް އިމިގްރޭޝަނަށް ސިޓީއެއް ފޮނުވާފައިވާނެކަމަށް ޝަމީމް ވިދާޅުވިއެވެ.
އަލީ ވަހީދުގެ މައްޗަށް އުފުލާފައިވާ ދައުވާތަކުގެ ތެރޭގައި ހިމެނެނީ، ޖިންސީ އަނިޔާ ކުރުމުގެ ކުށުގެ ދައުވާއާއި، ރޭޕްކުރަން އުޅުމުގެ ކުށުގެ ދައުވާއާއި، ބޭއަދަބީ ގޮތުގައި ޖިންސީ ގުނަވަން ހާމަކުރުމުގެ ކުށުގެ ދައުވާ އާއި، ޖިންސީ ގޯނާކުރުމުގެ ކުށުގެ ދައުވާއާއި، ޖިންސީ ގޯނާކުރަން އުޅުމުގެ ކުށުގެ ދައުވާގެ އިތުރުން، ހުއްދަ ނޫން ޖިންސީ މުއާމާލަތެއް ހިންގުމަށް އެދުމުގެ ކުށުގެ ދެ ދައުވާއެކެވެ. މި ދައުވާތައް އަލީ ވަހީދުގެ މައްޗަށް ސާބިތުވެއްޖެނަމަ، މަދުވެގެން 21 އަހަރުގެ ޖަލު ހުކުމެއް އަންނާނެއެވެ.