މާލޭ ސިޓީގައި ހިމެނޭ މާލޭގެ ރައްޔިތުންނަށް ގޯތި ދޭން އިތުރު ބިމެއް ހިއްކަން ނިންމާފައިވާ ކަމަށް މަޖިލީހުގެ ރައީސް މުހައްމަދު ނަޝީދު ވިދާޅު ވެއްޖެ އެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި ހައުސިން މިނިސްޓަރ މުހައްމަދު އަސްލަމް އާއި ގަލޮޅު ދެކުނު ދާއިރާގެ މެމްބަރު އީވާ އަބްދުﷲ ކުރެއްވި ސުވާލަކާއި ގުޅިގެން އަސްލަމް ވިދާޅުވީ ސަރުކާރުގެ ވިސްނުމުގައި މާލެ ރައްޔިތުންނަށް ބޯހިޔާވަހިކަން ދިނުމަށް ބިން ދޫކުރުމުގެ ވިސްނުން ހުރި ކަމަށެވެ.
“ރައީސް ދާދި ފަހުން ވިދާޅުވި އަދި އެހެން ވިސްނުމެއް އެބަ ގެންގުޅުއްވަމޭ އިތުރު ގޯތި ލިބޭނެ ގޮތެއް ހެއްދެވުމަށް. އަޅުގަނޑަކަށް ނޭގެ އަޅުގަނޑު ކަމެއް މިކަން އިއުލާނު ކުރަން ޖެހޭނީއެއް. އަޅުގަނޑަށް އެނގޭ ސަރުކާރުގެ ވިސްނުމެއް އެބައޮތްކަން އިތުރު ބިމެއްގެ ވިސްނުމެއް މާލޭގެ ރައްޔިތުންނަށް” އަސްލަމް ވިދާޅުވި އެވެ.
މިކަމުގެ ތަފްސީލު ދެއްވަމުން ނަޝީދު ވިދާޅުވީ މާލޭ މީހުނަށް ބިން ކަނޑާފައި ގޯތި ދޭން ބިން ހިއްކުމަށް ބޭނުންވާ ލޯނު ނެދަލެންޑްސްގެ އައިއެންޖީ ބޭންކުން ނެގުމަށް މިހާރު ވާހަކަ ދައްކަމުން އަންނަ ކަމަށެވެ. ލޯން ހަމަޖެހުނުހާ އަވަހަަކަށް ބިން ހިއްކަަން ފަށާނެ ކަމަށް ނަޝީދު ވިދާޅުވިއެވެ.