ކެފޭ އަދި ރެސްޓޯރެންޓް ފަދަ ތަންތަން 10:30 ވަންދެން ހުޅުވާފައި ބަހައްޓައިގެން ހައްލެެއް ނުލިބޭނެ ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.
މާލެ ސަރަހައްދުގެ ސައި ހޮޓާ ރެސްޓޯރެންޓާއި ކެފޭގެ އިތުރަށް ކާބޯތަކެތީގެ ޚިދުމަތްދޭ ތަންތަން ހުޅުވައިގެން ޚިދުމަތް ދެވޭ ވަގުތު ރޭގަނޑު 10:30 އަށް ބަދަލު ކުރީ މިއަދުއެވެ.
މިކަމާ ގުޅިގެން ނަޝީދު ވިދާޅުވީ އެ ތަންތަން10:30 ވަންދެން ހުޅުވާފައި ބަހައްޓައިގެން ހައްލެއް ލިބިދާނެ ކަމަށް އެ ވިޔަފާރި ހިންގާ ފަރާތްތަކުން ނުބުނާ ކަމަށެވެ.
“މިހާރު ބޭނުންވަނީ ދޫކޮށްލަން.” ނަޝީދު ވިދާޅުވިއެވެ.
އެޗްޕީއޭއިން މިއަދު ނެރުނު އެންގުމެއްގައި ބުނެފައިވަނީ ކާބޯތަކެތީގެ ހިދުމަތްދޭ އެންމެހާ ތަންތަނުގެ ހިދުމަތް ރޭގަނޑު 10:30 ހާއި ހަމައަށް ހުޅުވާލާ ކަމަށެވެ.
މާލޭގައި ކޮވިޑް-19 ބާރު ސްޕީޑެއްގައި ފެތުރޭތީ އެޗްޕީއޭއިން ވަނީ ޑެލިވަރީ އާއި ޓޭކްއަވޭ ހިދުމަތްތައްނޫން ކެފޭތަކުން ދޭ އެހެން ހިދުމަތްތައް 08:00 އާއި ހަމައަށް ދެވޭގޮތަށް ބަދަލުކޮށްފައެވެ. އަދި އެގޮތަށް އެޗްޕިއޭއިން އެންގުމާއި ގުޅިގެން މާލޭގައި ކެފޭ ރެސްޓޯރެންޓްތައް ހިންގާ ފަރާތްތަކުން އަންނަނީ ކަންބޮޑުވުންފާޅު ކުރަމުންނެވެ.
އަދި އެފަރާތްތަކުން ވަނީ ހިދުމަތް ދިނުން ހުއްޓާލާ އިހުތިޖާޖް ކުރާނޭ ކަމަށްވެސް ބުނެފައެވެ.