އައްޑޫގެ ކަރަންޓު މައްސަލަ ހައްލުކުރުމަށް ޖަނަރޭޓަރުތަކެއް ގެންގޮސްފި

އައްޑޫ ސިޓީގެ ކަރަންޓު ކެޕޭސިޓީ އިތުރު ކުރުމަށް ފެނަކަ ކޯޕަރޭޝަނުން ޖަނަރޭޓަރުތަކެއް އެ ސިޓީއަށް ގެންގޮސްފިއެވެ.

ފެނަކަ ކޯޕަރޭޝަނުން ބުނީ އައްޑޫއަށް އިތުރު ޖަނަރޭޓަރުތަކެއް ގެންދިޔައީ، ކުރިއަށް އޮތް ރޯދަމަހަކީ، ހޫނު މޫސުމަށް ވެފައި އައްޑޫގެ ކަރަންޓު ހާލަތު ނާޒުކު ހާލަތެއްގައިވާތީކަމަށެވެ. އައްޑޫޢަށް ގެންދިޔަ ޖަނަރޭޓަރުތަކާއެކު ކަރަންޓުގެ މައްސަލައަށް ބޮޑު ހައްލެއް ލިބޭނެކަމަށް ފެނަކައިން ބުންޏޭވެ.

ފެނަކައިގެ މެނޭޖިނގް ޑިރެކްޓަރ އަހުމަދު ސައީދު މިދިޔަ ހަފްތާގައި ވިދާޅުވެފައިވަނީ، އައްޑޫގެ ކަރަންޓަށް އަދިވެސް އެންމެ އެކަށީގެންވާ ހައްލެއް ލިބިފައިނުވާކަމަށާއި، އެހެން ކަމުން އައްޑޫގެ ކަރަންޓު ނެޓްވޯކުގެ އަމަލީ މަސައްކަތް ވީއެންމެ އަވަހަށް ފެށުމަށް މަސައްކަތްކުރަމުން އަންނަކަމަށެވެ. ފެނަކައިން ބުނެފައިވަނީ އައްޑޫއަށް ރޯދަމަހާ ދިމާކޮށް އެ ސިޓީއަށްގެންދާ ޖަނަރޭޓަރުތަކުގެ ސަބަބުން ދާއިމީ ހައްލެއް ލިބެންދެން، މިހާރުދިމާވާ މައްސަލަ ހައްލުވެގެންދާނެ ކަމަށެވެ.

އައްޑޫސިޓީ ކަރަންޓު ނެޓްވޯކް ކެޕޭސިޓީ އިތުރު ކުރުމުގެ މަސައްކަތް މިވަގުތު ފަށާފައިވާއިރު ޗައިނާގެ ޑޯން ފަންފޭންގް އިލެކްޓްރިކް އިންޓަރނޭޝަލްއާއެކު، އައްޑޫގެ ކަރަންޓު ވިއުގަ އަޕްގްރޭޑްކޮށް 20 މެގަވޯޓުގެ ކަރަންޓު އުފައްދާނެ އިންޖީނުގެއެއް ޤާއިމު ކުރުމުގެ އެއްބަސްވުމުގައި ވަނީ ސޮއިކޮށްފައެވެ. މިއީ 37.5 މިލިއަން ޑޮލަރުގެ މަޝްރޫއެކެވެ.