ފީ ނުދައްކާ، ގޭބިސީތަކުން ބޮޑެތި ބަރު ކުނި ނެރޭތީ ވެމްކޯގެ ކަންބޮޑުވުން!

މާލޭގެ ގިނަ ގޭބިސީތަކުން ވެމްކޯގައި ރެޖިސްޓްރީނުކޮށް މަގުތަކަށް ބޮޑެތި ބަރު ކުނި ނެރެމުންދާތީ ވެމްކޯއިން ކަންބޮޑުވުން ފާޅުކޮށްފި އެވެ.

ރޯދަމަހުގެ ފުރަތަމަ ދުވަހު މާލޭގެ މަގުތައް މަތީ ކުނިތައް ގިނަވެ، އާއްމުންގެ ފާޑުކިއުންތައް އަމާޒުވީ ވެމްކޯއަށެވެ. އެހެން ނަމަވެސް ކުންފުނިން ވަނީ، ރޯދަ މަހު ކުނި ނެރެން ޖެހޭ ގަޑިތަކާއި އަދި ކުނި ކޮތަޅުތައް ގޭބިސީތަކުން ނެރުމުގައި އަމަލު ކުރަންޖެހޭ ބައެއް އުސޫލުތައް އާއްމުކޮށްފައެވެ.

ފާއިތުވި ދެ ދުވަހެއްގެ ތެރޭގައި އާދަޔާ ހިލާފަށް ކުނި ކޮތަޅުތައް ގިނަވެ، ބައެއް ކުނިތައް މަގުތަކަށް އެޅިފައި ހުއްޓެވެ. އަދި އެކަމާއި ގުޅިގެން ބަޔާނެއް އާއްމުކޮށް ވެމްކޯއިން ބުނީ މާލެ ސަރަހައްދުގެ އެކި މަގުތަކަށް ގިނަ އަދަދެއްގެ ކުނި ޖަމާކޮށްފައިވާ މައްސަލަތަކެއް ލިބިފައިވާ ކަމަށެވެ. އަދި ފާހަގަ ކުރެވުނު އެ ކުނިތަކަކީ ދުވަހުގެ ކުނި ނެގުމުގެ އުސޫލަށް ނުފެތޭ، ބޮޑެތި ކުނިތަކެއްކަމަށް ބުންޏެވެ.

ވެމްކޯއިން ބުނީ މާލެ ސަރަހައްދުގެ ގޭބިސީތަކުގެ އިމާރާތުގެ ތިރީ ފަންގިފިލާއިން ކުނި ނެގުމުގެ ހިދުމަތް ފޯރުކޮށްދެމުން ދަނީ، ކޮވިޑާއި ގުޅިގެން އަޅާފައިވާ ފިޔަވަޅުތަކަށް ބަލައި އެންމެގެ ރައްކާތެރިކަމަށް ބެލުމަށްފަހުގައި ކަމަށެވެ. އެހެން ނަމަވެސް، ރެޖިސްޓްރީ ކުރުމެއް ނެތި ގިނަ އަދަދެއްގެ ގޭ ބިސީތަކުން ކުނި ނެރެމުންދާކަން ވެމްކޯއިން ވަނީ ފާހަގަކޮށްފައެވެ.

???? ނޫސް ބަޔާން: ފުރަމާލެ ސަރަހައްދުގެ ބައެއް މަގުތަކަށް ކުނި ޖަމާކުރަމުންދާ މައްސަލައާއި ގުޅޭ pic.twitter.com/mcY3pPVlY8

— Waste Management Corporation Limited (WAMCO) (@WAMCOmv) April 14, 2021

ކުރިޔަށް މިދިޔަނީ ރޯދަމަސްކަމަށްވުމާއި އެކު ގޭބިސީތަކުން ދައްކަންޖެހޭ ފީ ދެއްކުމާއި އެކު ވެމްކޯގައި ރެޖިސްޓްރީ ނުކޮށް އެއްވެސް ގޮތަަކަށް ފީ ނުދައްކާ ފަރާތަކުން ވެސް ކުންފުނީގައި ރެޖިސްޓްރީކުރުމަށް ވެމްކޯއިން ވަނީ އިލްތިމާސްކުރައްވާފަ އެވެ.

“މިބަރަކާތްތެރި ރަމަޟާންމަހު ރޯދައިގެ މަތިވެރި އަޅުކަމުގައި ތިއްބަވާއިރު، މިކޯޕަރޭޝަންގެ މަސައްކަތަށް ގޭބިސީތަކުން ދައްކަވަންޖެހޭ އުޖޫރައިގެ މަތިން ހަނދުމަފުޅުކޮށް އަރުވަމެވެ. އަދި ހިދުމަތަށް ރަޖިސްޓްރީކުރައްވާ، ބަރާބަރަށް ފީދެއްކުމަށް ހަނދާންކޮށްދެމެވެ.” ވެމްކޯ

ރޯދަ މަހަކީ އެހެން މަސްތަކާއި ހިލާފަށް ކުނި ގިނަވާ މަހެއްކަމުން، ހިދުމަތް ދިނުން ރާވާފައިވާނީ ކަސްޓަމަރުންނަށް ވީހާވެސް ފަސޭހަވާނެ އުސޫލަކުންކަމަށް ބަޔާނުގައި ވެއެވެ.

ރޯދަ މަހުގެ ތެރޭގައި ކުނި ނެރެން ޖެހޭ ގަޑިއަކީ ރޭގަނޑުގެ 20:00 އިން 23:00 އާއި ދެމެދުގައެވެ.

މީގެ އިތުރުން ގެތަކުން އުކާލާ ބޮޑެތި އަދި ބަރު ކުނިތައް، އުކާލުމުގެ އިންތިޒާމު ހަމަޖައްސައި ކޮންމެ ދުވަހަކު ވެސް ކެޕްސްގެ ހިދުމަތް ލިބޭނެ ކަމަށް ވެމްކޯއިން ވަނީ ބުނެފައެވެ.