ނަޝީދަށް ހަމަލާ ދިން މީހުންނަށް ހަރުކަށި އަދަބު ދޭން އިދިކޮޅުން ގޮވާލައިފި

އިދިކޮޅު ކޯލިޝަނުން ނެރުނު ބަޔާނުގައި ބުނެފައިވަނީ އެމަނިކުފާނު ކާރުކޮޅަށް އަރާވަޑައިގަންނަވަނިކޮށް އެމަނިކުފާނުގެ ގެކޮޅު ކައިރިން، ރައީސް ނަޝީދަށް އަމާޒުކޮށް ދިން ހަމަލާއެއްގައި އެމަނިކުފާނަށް އަނިޔާވެވަޑައިގެންނެވި ޚަބަރު އެ ކޯލިޝަނުން އެހީ ކުއްލި ސިހުމާއި ހިތާމައާއެކުގައި ކަމަށެވެ. އަދި އެމަނިކުފާނަށް އަވަސް ޝިފާއެއް ލިބުން އެދި މާތްﷲގެ ޙަޟުރަތުގައި ދުޢާ ދަންނަވާ ކަމަށްވެސް އެ ކޯލިޝަނުން ބުންޏެވެ.

އެ ކޯލިޝަނުން ނެރުނު ބަޔާނުގައި އިތުރަށް ބުނެފައިވަނީ ޕްރޮގުރެސިވް ކޮންގުރެސް ކޯލިޝަނުގެ ލީޑަރު އަދި ކުރީގެ ރައީސުލްޖުމްހޫރިއްޔާ ރައީސް ޢަބްދުﷲ ޔާމީން ޢަބްދުލްޤައްޔޫމާއި، އެ ޕާޓީގެ ލީޑާޝިޕާއި ކޯލިޝަން ޕާޓީތަކުގެ ކައުންސިލް މެންބަރުންނާއި، ސްޓިއަރިން ކޮމިޓީތަކާއި އާންމު މެންބަރުންގެ ނަމުގައި، ރައީސް ނަޝީދަށް އަމާޒުކޮށް ދިން ހަމަލާ ކުށްވެރިކުރާ ކަމަށެވެ. އަދި އެ ހުރިހާ ބޭފުޅުންގެ ނަމުގައި ހަމްދަރުދީ ފާޅުކުރާ ކަމަށްވެސް ކޯލިޝަނުން ބުންޏެވެ.

އޭގެ އިތުރަށް ރައީސް ނަޝީދަށް އަމާޒުކޮށް މިރޭ އިރާކޮޅު ދިން ހަމަލާ ރާވައި ތަންފީޒުކުރި ހުރިހާ ފަރާތްތައް ހޯދައި ޤާނޫނުގެ ކުރިމައްޗަށް ގެނެސް އެންމެ ހަރުކަށި އަދަބު ދިނުމަށްވެސް އެ ބަޔާނުގައި ގޮވާލާފައިވެއެވެ.

މިރޭ އިރާކޮޅު ކާރުކޮޅަށް އަރާވަޑައިގަންނަވަނިކޮށް ނަޝީދުގެ ގެކޮޅު ހުންނަ ސަރަހައްދުގައި ބާރުގަދަ އެއްޗެއް ގޮއްވައިލުމުގެ ސަބަބުން އެމަނިކުފާނަށް އަނިޔާވެ މިހާރު އެމަނިކުފާނަށް ފަރުވާދެމުން އަންނަނީ އޭޑީކޭ ހޮސްޕިޓަލުގައެވެ.