ނަޝީދުގެ ހާލުކޮޅު ކްރިޓިކަލް، އޮންނެވީ އައިސީޔޫގައި: އޭޑީކޭ

ރައީސް މުހައްމަދު ނަޝީދުގެ ހާލުކޮޅު ކްރިޓިކަލް ކަމަށާއި އޮންނެވީ އައިސީޔޫގައި ކަމަށް އެމަނިކުފާނަށް ފަރުވާދެމުން އަންނަ އޭޑީކޭ ހޮސްޕިޓަލުން ދެންމެ ހާމަކޮށްފި އެވެ.

އޭޑީކޭ ހޮސްޕިޓަލުން ކުރި ޓްވީޓެއްގައި ބުނީ ނަޝީދުގެ ފުރާނަ ސަލާމަތް ކުރުމަށް ފާއިތުވި 16 ގަޑިއިރުގެ ތެރޭގައި ނަޝީދުގެ ބޮލަށާއި، މެޔަށް، ބަނޑަށް އަދި އަތަށާއި ފަޔަށް ލިބިފައިވާ ޒަހަމްތަކަށް ސާޖަރީތައް ހަދާފައިވާ ކަމަށެވެ.

“އައިސީޔޫގައި ނަޝީދު އަދިވެސް އޮންނެވީ ކްރިޓިކަލް ހާލަތެއްގައި” އޭޑީކޭ އިން ބުންޏެވެ.

President Nasheed underwent a successful final, critical, life-saving procedure this afternoon. Over the course of past 16 hours he had life-saving surgery on injuries to his head, chest, abdomen and limbs. He remains in a critical condition in intensive care.

— ADK Hospital (@ADKHospital) May 7, 2021

އޭޑީކޭއިން އަދި ބުނީ އާއިލާގެ އިޒުނައާ އެކު އެމަނިކުފާނުގެ ސިއްހީ ހާލުކޮޅުގެ މައުލޫމާތާއި ފަރުވާގެ މައުލޫމާތު އާންމު ކުރަމުން ގެންދާނެ ކަމަށެވެ.

މީގެ އިރުކޮޅެއް ކުރިން ނަޝީދުގެ ކޮއްކޯފުޅު ނާޒިމް އަބްދުއްސައްތާރު ވަނީ މިހާރު ސާޖަރީތައް ނިމިފައިވާ ކަމަށާއި އަދި ދެން އޮތީ ރިކަވަރީ ކަމަށް ވިދާޅުވެ ޓްވީޓް ކުރައްވާފައެވެ.

ނަޝީދުގެ ކާރުކޮޅު ކައިރީގައި ބާރުގަދަ އެއްޗެއް ގޮއްވާލައި ދިން ހަމަލާއާ ގުޅިގެން ރެއިން ފެށިގެން އެމަނިކުފާނަށް އަންނަނީ އޭޑީކޭ ހޮސްޕިޓަލުގައި ފަރުވާ ދެމުންނެވެ.

ރޭގެ ހަމަލާ ދީފައިވަނީ ސީދާ ނަޝީދުގެ ފުރާނައަށް ގެއްލުންދޭން ކަމަށާއި މިއީ ޓެރަރިސްޓު ހަމަލާއެއް ކަމަށް ކޮމިޝަނާ އޮފް ޕޮލިސް މުހައްމަދު ހަމީދު މިއަދު ވަނީ ވިދާޅުވެފައެވެ. އަދި މި ހަމަލާއާ ގުޅިގެން ހަތަރު މީހަކު ފާހަގަކުރެވިފައިވާ ކަމަށާއި ބޭރުގެ ފަރާތްތަކާ ގުޅިގެން ތަހުގީގު ކުރިއަށްދާ ކަމަށް ސީޕީ ވިދާޅުވިއެވެ.

އިތުރު ތަފްސީލު އަންނަނީ…