ބުރާސްފަތި ދުވަހުގެ ރޭ ކުރީގެ ރައީސް އަދި މަޖިލީހުގެ ރައީސް މުހައްމަދު ނަޝީދަށް އަމާޒުކޮށް ދީފަިއވާ ބޮމުގެ ހަމަލާއާއި ގުޅިގެން ފުލުހުން މާލެއާއި ހުޅުމާލޭގައި އޮޕަރޭޝަންތަކެއް ކުރިއަށް އެބަގެންދެއެވެ.
ރައީސް ނަޝީދަށް އަމާޒުކޮށް ދިން ޓެރަރިސްޓް ހަމަލާއާ ގުޅިގެން ފުލުހުންނާއި ސިފައިން ވަނީ މާލޭގައި ހަރަކާތްތެރިވާން ފަށާފައެވެ. އަދި އެ މައްސަލައިގައި ހަތަރު މީހަކު ފުލުހުންގެ ސަމާލުކަމަށް އައިސްފައިވާއިރު މިހާތަނަށް ދެ މީހަކު ވަނީ ހައްޔަރުކޮށްފައެވެ.
މައުލޫމާތު ލިބޭ ގޮތުގައި މާލޭގައި ފުލުހުން އޮޕަރޭޝަން ކުރިއަށް ގެންދަނީ އަލިކިލެގެފާނު މަގުގައި ހުރި ގ. ގަދަފެހިގެ ގޯޅި ތެރޭގައި ހުރި ގެއެއްގައެވެ. އަދި ހުޅުމާލޭގައި ފުލުހުން އޮޕަރޭޝަން ކުރިއަށް ގެންދަނީ ރަބަރުގަސްމަގު 4ވަނަ ނަމްބަރު ގޯޅީގައި ކަމަށްވެސް މައުލޫމާތު ލިބެއެވެ.
މި އޮޕަރޭޝަންގައި ފުލުހުން ވަނީ ސައިކަލެއް ވެސް ވެހިކަލަށް އަރުވައިގެން ގެންގޮސްފައެވެ.