ބުރާސްފަތި ދުވަހުގެ ރޭ ރައްޔިތުންގެ މަޖިލީހުގެ ރައީސް މުޙައްމަދު ނަޝީދުގެ ފުރާނަ ދުއްވާލުމަށް ދިން ޓެރެރިސްޓް ހަމަލާއާއި ގުޅިގެން ފުލުހުންނަށް ދޭން ޖެހޭ އެންމެހާ އެއްބާރުލުން ދެއްވާނެކަމަށް ޕްރޮފެސަރ އުގެއިލް ވިދާޅުވެއްޖެއެވެ.
ޕްރޮފެސަރ އުގެއިލް ކުރެއްވި ޓްވީޓެއްގައި ވިދާޅުވީ މި ހަމަލާއާ ގުޅޭގޮތުން ޕްރޮފެސަރގެ ޕްރޮފެޝަަނަލް ކެޕޭސިޓީއާއިއެކު މިކަމުގައި ފުލުހުންނަށް ތަހުގީގުގައި ދޭންޖެހޭ އެންމެހާ އެއްބާރުލުން ދޭނެ ކަމަށެވެ. އަދި މިކަމާ ގުޅޭ އެއްވެސް މައުލޫމާތެއް ނުވަތަ ހެއްކެތް ލިބިއްޖެނަމަ ފުލުހުންނާއި ހިއްސާ ކުރާނެކަމަށް ވަނީ ވިދާޅުވެފައެވެ.
ރައީސް ނަޝީދަށް ދިން ހަމަލާއާއި ގުޅިގެން ދެ މީހަކު ވަނީ ފުލުހުންގެ ބެލުމުގެ ދަށަށް ގެނެސްފައެވެ. އަދި މި ޙާދިސާގެ އެންމެ ބޮޑު “ސަސްޕެކްޓް” ހޯދުމަށް ފުލުހުން ވަނީ ޢާންމުންގެ އެހީއަށް އެދިފައެވެ.