މީހަކު ބުނެލާ ކޮންމެ ބަހަކީ ތެދަށް ނުވެދާނެ ކަމަށް ބުނެ ކެނދިކުޅުދޫ ދާއިރާގެ މެމްބަރު އަހުމަދު އީސަގެ ދިފާއުގައި އީސަގެ ދޮށީ ދަރި މުހައްމަދު ޖިދާދު އަޑު އުފުލައިފި އެވެ.
މެމްބަރު އީސަގެ މައްޗަށް އަންނަނީ މަސްތުގެ ހާލަތުގައި ހުރެ ކުރީގެ އަނބިމީހާ އަސްރާ ނަސީމަށާއި ދަރިފުޅަށް ޖިސްމާނީ އަނިޔާކޮށް މަރާލާނެ ކަމުގެ އިންޒާރު ދިންކަމުގެ ތުހުމަތު ކުރެވެމުންނެވެ. މިކަން ދިފާއުކޮށް މެމްބަރު އީސަގެ ދޮށީ ދަރި ބުނެފައިވަނީ ގެއްލުނު އިއްޒަތެއް އަނބުރާ ނުލިބޭނެކަމަށެވެ. އަދި އޭނާ ހިއްސާކުރާ މައުލުމާތުގެ ބޭނުމަކީވެސް ބަޔަކު ބަދުނާމު ކުރުން ނޫން ކަމަށާއި ހައްގު ހޯދަން މަސައްކަތް ކުރުމަށް އާދޭސްކުރާ ކަމަށް ބުނެފައިވެއެވެ.
ޖިދާދު ހާމަކޮށްފައިވާ ބައެއް މައުލޫމާތުތަކަށް ބަލައިލާއިރު، އޭނާ ބޭރުގައި ތައުލީމް ހާސިލްކުރުމަށް ހުރުމަށްފަހު ކޮވިޑްގެ ހާލަތާއިއެކު ރާއްޖެ އައިސް މިވަގުތު އުޅެމުންދަނީ ބައްޕަ އަހުމަދު އީސާއާއި، ދޮންމަންމަ އަސްރާ އަދި ކޮއްކޮއާއެކުކަމަށް ބުނެފައިވެ އެވެ. އަދި ބައްޕައާއި އަސްރާ ވަރިވެފައިވާކަން އެނގޭ ކަމަށާއި އެހެން ނަމަވެސް ކޮއްކޮއަކީ އަދި ވަރަށް ތުއްތު ކުއްޖެއްކަމުން ދެ ފަރާތުގެ އެއްބަސްވުމާއެކު އެއް ގެއެއްގައި އެންމެންވެސް އުޅެމުން އަންނަކަމަށެވެ. ބައްޕަ އައީ އާއިލާގެ ހުރިހާ ކަމެއް ވަރަށް ރަނގަޅަށް ބަލަހައްޓަމުން ކަމަށާއި އެއްވެސް މީހަކަށް އެއްވެސް ކަމަކަށް ދަތިވިޔަ ނުދީ ފޯރުކޮށްދެމުން އަންނަކަމަށް ބުނެފައިވެއެވެ.
ހާދިސާއާއި ގުޅޭގޮތުން ވާހަކަދައްކަމުން، މެމްބަރު އީސަގެ ދަރިފުޅު ބުނީ ކަން ހިނގާ ދިޔަ ދުވަހުވެސް ވަރަށް ގާތުން ހުރިހާ ކަމެއްވެސް ފެނިފައިވާ ކަމަށެވެ. ނަމަވެސް މައްސަލައަކީ ބަލަމުން އަންނަ މައްސަލައަކަށް ވުމުން ކަންހިނގައި ދިޔަ ގޮތް ތަފްސީލުކޮށް ދެއްކުން އެއީ އެންމެ ރަނގަޅުގޮތް ކަމުގައި ނުދެކޭކަމަށާއި އެހެންނަމަވެސް، ބައްޕަގެ ބޮލުގައި އަޅުވާފައި ވަނީ ވަރަށްވެސް ހުތުރު އަދި ދޮގު ތުހުމަތެއްކަން ޔަގީންކޮށްދޭ ކަމަށް ބުނެފައިވެއެވެ.
މައްސަލައިގައި އީސަ ނިސްބަތްވާ ޕާޓީ، އެމްޑީޕީއިންވެސް ފިޔަވަޅު އަޅާފައިވާއިރު، އެޕާޓީއިންވެސް ވަނީ އިންސާފުވެރި އަވަސް ތަހުގީގެއް ހިންގަުމަށް ގޮވާލާފައެވެ. އަދި ރައްޔިތުންގެ މަޖިލީހުގެ އިޖްތިމާއީ ކޮމެޓީގެ މުގައްރިރުކަމުން ވަކިކުރަން އުޅުމުން، އީސަ ވަނީ އަމިއްލައަށް އެމަގާމުން އެކަހެރިވެފައެވެ.