ޓެރަރިޒަމް އާއި ހަރުކަށި ފިކުރު ފަތުރާ މީހުން ތިބީ ސަރުކާރުގައި ކަމަށް މަޑުއްވަރީ ދާއިރާގެ މެމްބަރު އާދަމް ޝަރީފް ވިދާޅުވެއްޖެއެވެ.
އާދަމް ޝަރީފް މިހެން ވިދާޅުވެފައިވަނީ ގައުމުގައި މިއަދު ކަންކަންވަމުންދާ ގޮތް ގާތުން ބެއްލެވުމަށް ރައްޔިތުންގެ މަޖިލީހުގެ ރައީސް އަދި އެމްޑީޕީގެ ރައީސް މުހައްމަދު ނަޝީދު އިދިކޮޅު ޕީޕީއެމް، ޕީއެންސީއަށް ގޮވާލުމާ ގުޅިގެންނެވެ.
އެކަމާ ގުޅިގެން އާދަމް ޝަރީފް ވިދާޅުވީ ޓެރަރިޒަމާއި ހައްދުފަހަނައެޅުމުގެ ނުރައްކާ ރާއްޖެ އަށް ބޮޑުވަމުންދަނީ ސަރުކާރުގެ ސިޔާސަތުތަކުގެ ސަބަބުން ކަމަށާއި އެކަމުގެ ޒިންމާ ނަގަން ޖެހޭނީ އެމްޑީޕީ އިސްވެ އޮތް ސަރުކާރުން ކަމަށެވެ.
“ޓެރަރިޒް އާއި ހަރުކަށި ފިކުތު ފަތުރާ މީހުން ތިބީ ސަރުކާރުގައި. ފުރަތަމަ ސަރުކާރުގެ އެތެރެ ސާފުކުރައްވާ” އާދަމް ޝަރީފް ވިދާޅުވިއެވެ.
އިންޑިއާގެ ޑީއެންއޭ ނޫހަށް ދެއްވި އިންޓަވިއުއެއްގައި ނަޝީދު ވިދާޅުވީ މިހާރު ރާއްޖޭގައި ބޮޑެތި ހަމަނުޖެހުންތައް އުފެދިފައިވާކަމަށެވެ. އަދި ޕީޕީއެމާއެކު މަސައްކަތްކުރުމަށް ނިންމެވި ނިންމެވުމަކީ އެމަނިކުފާނު ހަމަ ހަގީގަތުގައިވެސް އެކަމަށް ބޭނުންވެގެން ނިންމެވި ނިންމެވުމެއްކަމަށްވަނީ ވިދާޅުވެފައެވެ.