ސްޓެލްކޯއިން ބަންދުކޮށްފައިވާ މާލޭގެ ބައެއް މަގުތަށް ނުހުޅުވާނަމަ، އެމައްސަލަ ކޯޓަށް ހުށައަޅާނެކަމަށް މާލެ ސިޓިގެ މޭޔަރު ޑރ. މުހައްމަދު މުއިއްޒު ވިދާޅުވެއްޖެއެވެ.
މިކަމާއި ގުޅިގެން ނޫސްވެރިންނާއި ބައްދަލުކުރައްވައި ޑރ. މުއިއްޒު ވަނީ އެ މަގުތަކާއި ގޯޅިތަށް ހުޅުވުމަށް މާލޭ ސިޓީ ކައުންސިލުން ސްޓެލްކޯއަށް ލިޔުމުން އަންގާފައިވާނެ ކަމަށް ބުނެފައެވެ. އަދި މިމަސައްކަތް ކުރުމަށް ސިޓީ ކައުންސިލުން އެއް މަސްދުވަހުގެ މުއްދަތެއް ދީފައިވާނެ ކަމަށްވެސް ބުނެފައިވެއެވެ.
އެހެންނަމަވެސް އެމަގުތައް ހުޅުވައި އެކަން އެގޮތަށް ކުރެވެން ނެތްކަމަށް ސްޓެލްކޯއިން ބުނެފައިވާކަމަށް ޑރ.މުއިއްޒު ވިދާޅުވިއެވެ. އަދި އެމަގުތައް ހުޅުވާލައިފިނަމަ މާލެ ސަރަހައްދަށް ކަރަންޓު ދިނުމުގައި ދަތިތަކެއް ދިމާވުމަކީ އެކަށީގެންވާކަމެއް ކަމަށާއި، އެކަން އެހެން ކުރުމަކީ އުނދަގޫ ކަމެއް ކަމަށް އެކުންފުނިން ހާމަކޮށްފައިވާކަމަށް މޭޔަރު ވިދާޅުވިއެވެ.
އެހެންނަމަވެސް ބަންދުކޮށްފައިވާ ގޯޅިތަކަކީ ދާއިމަށް ދީފައިވާ ގޮޅި ތަކެއް ނޫންކަން ފާހަގަކުރައްވައި މުއިއްޒު ވިދާޅުވީ، ސްޓެލްކޯގެ ބޭނުމަށް ބަންދުކޮށްފައިވާ ގޯޅިތަކާއި މަގުތަށް ހުޅުވާލުމަށްޓަކައި ކޯޓަށް ދާންޖެހޭނަމަ އެކަންވެސް ކުރައްވަން އެމަނިކުފާނު ހުރީ ތައްޔާރަށްކަމަށެވެ.
ސްޓެލްކޯއާއި އެމްޑަބްލިއުއެސްސީއިން ބައެއް މަގުތައް ބަންދުކޮށްފައިވާތީ އެކަމާއި ކަންބޮޑުވުން ފާޅުކޮށް އެމަގުތައް ހުޅުވާލުމަށް މޭޔަރު މުއިއްޒު އަންނަނީ ގޮވާލަމުންނެވެ، ސްޓެލްކޯއާއި މާލެ ސިޓީ ކައުންސިލާއި ދެމެދު ހިޔާލު ތަފާތުވުންތަކެއް ހުރެ ކުންފުންޏާއި ކައުންސިލުން އަންނަނީ ބަހުގެ ހަމަލާތަކެއް އަމާޒުކުރަމުންނެވެ.