ބައެއް ގްރޭޑްތަކުގެ ފޮތްތަކުގައި ޤުރުއާނުގެ އާޔަތެއް ނުބައިކޮށް އޮތް މައްސަލާގައި އިހުމާލުވެފައިވާ ފަރާތްތައް ދެނެގަތުމަށް ކޮމިޓީއެއް އެކުލަވާލާފައިވާ ކަމަށް އެޑިއުކޭޝަން މިނިސްޓްރީން ބުނެފިއެވެ.
ގްރޭޑް އެކެއް އަދި ދޭއްގެ ފޮތްތައް ޗާޕްކުރި އިރު ދެ ސޫރަތެއްގެ އާޔަތްތައް އެކުވި މައްސަލައެއް މިދިޔަ ހަފްތާ ވަނީ ފެންމަތިވެފަ އެވެ. އަދި އިއްޔެ ވަނީ ގްރޭޑު ދޭއް އަދި 12ގެ އިސްލާމް ފޮތްތަކުގައި ވެސް އެފަދަ މައްސަލަތަކެއް ހުރި ކަން ހާމަވެފަ އެވެ.
މިކަމާ ގުޅިގެން މިއަދު ބޭއްވި ނޫސްވެރިންގެ ބައްދަލުވުމުގައި އެޑިޔުކޭޝަން މިނިސްޓަރު ޑރ. އައިޝަތު އަލީ ވިދާޅުވީ މައްސަލަތަކެއް ހުރި ހަތަރު ފޮތެއް ފާހަގަކުރެވިފައިވާކަމަށެވެ.
މިނިސްޓަރު ވިދާޅުވީ ފޮތްތައް އެކުލަވާލުމަށްފަހު ޕްރޫފް ރީޑް ކުރުމުގެ މަރުޙަލާ ކުރިއަށްގެންދާ ކަމަށާ އެ މަރުޙަލާއަށްފަހު އިސްލާމިކް މިނިސްޓްރީން ވެސް ފޮތްތައް ފާސް ކުރާ ކަމަށެވެ.
އެގޮތުން އެ ދެ މަރުހަލާގައި ވެސް އެންމެ އެކަށީގެންވާ ވަރަށް ބެލިފައި ނުވާ ކަން މިނިސްޓަރު ވަނީ ފާހަގަކުރައްވާފައެވެ.
އެހެންކަމުން ފޮތްތަކުގައި މައްސަލަ ދިމާވި ސަބަބުން ދެނެގަތުމަށް މަސައްކަތް ފަށާފައިވާކަމަށާއި މިކަމުގައި އިހުމާލުވެފައިވާ ފަރާތްތައް ދެނެގަތުމަސް ކޮމިޓީއެއް އެކުލަވާލާފްއިވާކަމަށް މިނިސްޓަރު ވިދާޅުވިއެވެ.