“ހެއްކާބެހޭ ބިލު”ގެ ބަހުސް ރައްޔިތުންގެ މަޖިލީހުގައި ފަށައިފިއެވެ.
ސަރުކާރުގެ ފަރާތުން މި ބިލު މަޖިލީހަށް ހުށަހެޅުއްވީ، ތިނަދޫ އުތުރު ދާއިރާގެ މެންބަރު އަބްދުލް މުޣުނީ އެވެ.
އެ ބިލުގައި، އެއްވެސް ޝައްކެއް ނެތް މިންވަރަށް ކަމެއް ސާބިތުވާ ހާލަތުގައި ހެކި ހުށަހެޅުމެއް ނެތި އެކަން ސާބިތު ވާނެ ކަމާއި، އެގޮތަށް ސާބިތު ވާނެ ކަންތައްތަކަކީ ކޮބައިކަން ތަފްސީލު ކޮށްފައި ވެއެވެ.
މީގެއިތުރުން މި ބިލުގައި މަދަނީ މައްސަލަތަކުގައާއި ޖިނާއީ މައްސަލަތަކުގައާއި އިސްލާމްދީނުގައި ހައްދު އަދި ޤިސާސް ކަނޑައެޅިފައިވާ ކުށްތައް ސާބިތުކުރުމަށް ބޭނުންވާ ހެކީގެ ނިސްބަތް ކަނޑައެޅުމާއި، ސާބިތުކުރުމުގެ ޒިންމާއާގުޅޭ އުސޫލުތައް ކަނޑައަޅާފައިވެއެވެ.
ހެއްކާބެހޭ ބިލުގައި ހެކި ހުށަހެޅުމަކާ ނުލައި، ސާބިތުވެގެންވާ ކަންކަމުގެ ގޮތުގައި ކޯޓުން ބަލައިގަންނާނެ ކަންކަން ބަޔާންކޮށްފައިވާއިރު ހެކީގެ ގޮތުގައި ހުށަނޭޅޭނެ، އިމްތިޔާޒު ލިބިގެންވާ ކަންކަން ބަޔާންކޮށްފައިވެއެވެ. އަދި އެނޫންވެސް ހެއްކާބެހޭ އާންމު އުސޫލުތައް ވެސް ކަނޑައަޅާފައިވެއެވެ.
ހެކީގެ ގޮތުގައި ހުށަ ނޭޅޭނެ ކަންކަންވެސް މި ބިލުގައި ބަޔާން ކޮށްފައިވެ އެވެ. މީގެ އިތުރުން ހެކީގެ ދަރަޖަ ތަކާއި، ހެކި ސާބިތު ކުރުމަށް އެހީވެދޭ ނިސްބަތާއި، ހެކި ބައި ކުރެވޭނެ ގޮތްތައްވެސް ބިލުގައިވެ އެވެ.
ހެކިބަސްދޭ ފަރާތަށް ސީދާ ކަމެއް އެނގިފައި އޮވެގެން މެނުވީ އެކަމުގައި ހެކިބަސް ނުދިނުމާއި، ހެކިބަސް ދިނުމުގެ ގާބިލުކަން ހުރި ފަރާތްތަކަކީ ކޮބައިކަމާއި ހެކިބަސް ދޭ މީހާގެ ކިބައިގައި ހުންނަން ޖެހޭ ޝަރުތުތައްވެސް މި ބިލުގައި ބަޔާންކޮށްފައިވެ އެވެ.