ގެއްލުނު ފަތުރުވެރިޔާ އަދިވެސް ނުފެނޭ!

ޑައިވިނަށް ގޮސް އުޅެނިކޮށް އިއްޔެ މެންދުރު ގެއްލުނު ފަތުރުވެރިޔާގެ އަދިވެސް ނުފެންނަ ކަމަށް އެމްއެންޑީއެފްއިން ބުނެފި އެވެ.

ގެއްލިގެން ހޯދަމުން އަންނަނީ އދ.މަންދޫ ކައިރި ފަރަކަށް ޑައިވް ކުރަންދިޔަ “ގޮމަ” ނަމަކަށް ކިޔާ ދޯނިން ޑައިވިނަށް ފޭބި ފަތުރުވެރިއެއް ކަމަށެވެ.

އެމްއެންޑީއެފުން ބުނެފައިވަނީ ގެއްލިގެން ހޯދަމުންދާ ފަތުރުވެރިޔާ ހޯދުމަށް އެމްއެންޑީއެފް ކޯސްޓްގާޑް ޝިޕް ޝަހީދު ޢަލީއާއި އެމްއެންޑީއެފް ކޯސްޓްގާޑް ފާސްޓް އިންޓަސެޕްޓަރ ކްރާފްޓް “ވެލާނާ” ދަނީ ޑައިވަރުންނާއެކު އެ ސަރަހައްދުގައި ހަރަކާތްތެރިވަމުން ކަމަށެވެ.

ސާފޭސް ސާރޗްގެ އިތުރުން، ޑައިވް ކޮށްގެން ގެއްލިފައިވާ މީހާ ހޯދުމުގެ މަސައްކަތް ކުރަމުންދާކަމަށްވެސް ބުނެފައިވެއެވެ. މިމަސައްކަތުގައި އެސަރަހައްދުގެ ރިސޯޓްތަކުގެ ޑައިވަރުން ވެސް ހަރަކާތްތެރިވަމުންދާ ކަމަށާއި، އަދި މިއަދު ވައިގެ މަގުންވެސް ސާރޗްކުރިއަށް ދާނެ ކަމަށް އެމްއެންޑީއެފުން ބުނެފައިވެއެވެ.

މިހާތަނަށް ކުރެވުނު މަސައްކަތުން ފަތުރުވެރިޔާ އަދި ފެނިފައެއްނުވެއެވެ.