ވަކި ރަށެއްގައި ހިދުމަތް ގާއިމުކޮށް، އެހެން ރަށެއްގައި އެ ހިދުމަތެއް ގާއިމު ނުކުރެވި ހުރުމަކީ ތަރުތީބު އޮޅޭ ސަބަބެއްކަމަށް އިދިކޮޅުގެ ރިޔާސީ ކެންޑިޑޭޓު މާލޭގެ މޭޔަރު ޑރ. މުހައްމަދު މުއިއްޒު ވިދާޅުވެއްޖެ އެވެ.
2023 ގެ ރިޔާސީ އިންތިހާބުގެ ކެންޑިޑޭޓު މުއިއްޒުގެ އަތޮޅުތެރޭގެ ހަރަކާތްތައް ފެށިއިރު، މި ދަތުރުތަކުގެ ދަށުން މެނިފެސްޓޯ އެކުލަވާލުމުގެ މަސައްކަތް ކުރިޔަށް ދާނެ އެވެ.
މި ސަރުކާރުގެ ސިޔާސަތަކީ ކުދި ރަށްތަކާއި ބޮޑެތި ރަށްތައް ތަފާތު ކުރުމެއް ނެތި ތަރައްގީ ގެނައުން ނަމަވެސް ބައެއް ފަހަރަށް އާބާދީ ބޮޑެތި ރަށްތަކުގައި އަސާސީ ހިދުމަތްތައް ފުރިހަމަ ގޮތުގައި ތަންފީޒު ނުވެ އޮވުމުގެ ކަންބޮޑުވުން އޮވެ އެވެ.
ރިޔާސީ ކެމްޕެއިނުގެ ދަތުރުގެ ތެރެއިން ރާއްޖޭގެ އާބާދީގެ ނިސްބަތުން ބޮޑެތި ރަށްތައް ހުއްޓައި ވެސް، އެ ރަށްތަކަށް މާބޮޑު ސަމާލުކަމެއް ނުދޭކަމުގެ މިސާލު މުއިއްޒު ނެންގެވީ ހދ. ނޮޅިވަރަމްއިންނެވެ. ރަށުގެ ހާލަތު ދަށްވެފައި، މަގުތަކުގައި ތާރު އެޅިފައި ނެތުމަކީ މައްސަލައެއްގެ ގޮތުގައި ނަންގަވައި މުއިއްޒު ވިދާޅުވީ މިއަށް ވުރެ ކުދި ރަށްތަކުގައި ވެސް ސަރުކާރުން އެ ވައުދުވެ ތަންފީޒު ކުރަމުން ގެންދާކަމަށެވެ.
މުއިއްޒު ވިދާޅުވީ އާބާދީ ބޮޑެތި ރަށްތައް ދޫކޮށް، އެގިތަށް އަމަލު ކުރުމުގެ ސަބަބުން ތަރުތީބުގައި ކޮންމެވެސް ވަރެއްގެ އޮޅުމެއް އަރާ ކަމަށެވެ.
އެއަށް ފަހު ދެން މުއިއްޒު އެ ދާއިރާއަށް ވައުދުތައްވެ، މަގުތަކުގައި ތާރު އަޅައި ޒަމާނީ ފެންވަރަށް ތަރައްގީ ކުރާނެކަމަށް ވިދާޅުވި އެވެ. އޭގެ އިތުރަށް ބަނދަރު ފުން ކުރުމާއި، ބައްތި ޖެހުން ފާހަގަކުރި އެވެ. މުއިއްޒު ވިދާޅުވި ގޮތުގައި އެންމެ ފަހުން ނޮޅިވަރަމްގެ ބަނދަރުގެ މަސައްކަތް ކުރިޔަށް ގެންގޮސްފައި ވަނީ އިދިކޮޅުގެ ލީޑަރު ރައީސް އަބްދުﷲ ޔާމީންގެ ވެރިކަމުގަ އެވެ. އޭރު އެއޮތް ހާލަތާއި އެއްގޮތަށް އެގެނައި ބަދަލު މިހާރު އިތުރަށް ތަރައްގީ ކުރަން ޖެހިފައިވާ ސަބަބެއްކަމަށް މުއިއްޒު ވިދާޅުވީ އެކި ގޮތްގޮތުން އަންނަ ކުރިއެރުމާއި، ވައްޓަފާޅިއަށް އަންނަ ބަދަލާއި އެކު ބަނދަރު ބޮޑު ކުރަން ޖެހިފައިވުމެވެ.
މިއީ ރައްޔިތުންގެ ވެސް ހުށަހެޅުމެއްކަމަށްވުމާއި އެކު މުއިއްޒު ވިދަޅުވީ ބަނދަރު ބޮޑު ކުރުމާއި ނެރަށް ބަދަލު ގެންނަން ޖެހޭ ކަމަށެވެ. ބަނދަރު ބޭނުން ކުރުމުގައި އިތުރު ލުއިފަސޭހަތައް ހަމަޖައްސަވާނެކަމަށް މުއިއްޒު ވިދާޅުވި އެވެ.
ކެމްޕެއިން ދަތުރުތަކުގައި މުއިއްޒާއި އެކު ޕާޓީގެ ލީޑާޝިޕް ވެސް ދަނީ ބައިވެރިވަމުންނެވެ.
