2023 ގެ ރިޔާސީ އިންތިހާބުގައި ވާދަކުރުމަށް، އިދިކޮޅު ލީޑަރު ރައީސް އަބްދުﷲ ޔާމީން އަބްދުލްގައްޔޫމަށް ފުރުސަތު ގެއްލުމުން، ރިޔާސީ ޓިކެޓު ދޭނެކަމަށް ހީކުރި ނަމަވެސް އެގޮތަށް ޕާޓީން ނިންމާފައި ނުވާތީ ކުރީގެ ރައީސް ޑރ. މުހައްމަދު ވަހީދު ހަސަން މަނިކު ދެއްކެވި ވާހަކައަށް އިދިކޮޅުގެ ހިންގެވުމާއި ހަވާލުވެ ހުންނެވި އަބްދުރައްހީމް އަބްދުﷲ ރައްދު ދެއްވައިފި އެވެ.
ރިޔާސީ އިންތިހާބުގައި ވާދަކުރުމަށް މުއިއްޒު ފޯމު ހުށަހަޅައި، އިލެކްޝަންސް ކޮމިޝަނުން ބަލައިގަތުމަށް ފަހު ޕީޕީއެމްގެ އެޑްވައިޒަރަކަށް ހުންނެވި ޑރ. ވަހީދު އެ ޕާޓީއާއި ދުރުން ހުންނެވިކަން ފާހަގަކުރެވުނެވެ. އޭގެ ކުރިން ވެސް އެމަނިކުފާނު ވިދާޅުވީ، ރައީސް ޔާމީނަށް އިންތިހާބުގައި ވާދަނުކުރެވޭ ހާލަތެއްގައި ޓިކެޓަށް ޝައުގުވެރިކަން އެބަހުރި ކަމަށެވެ. ގާތްގަނޑަކަށް ހަތަރު އަހަރު ސިޔާސީ މައިދާނާ ދުރުން ހުންނެވުމަށް ފަހު ޕީޕީއެމްގެ ހަރަކާތުން ފެނުމުން ވެސް އޭރު ގިނަ ބަޔަކު އެ ސުވާލު އުފެއްދި އެވެ.
ޕީޕީއެމުން ވަކިވެ، ޕާޓީގެ ސެކޭޓްރީ ޖެނެރަލަށް ފޮނުވި ސިޓީގައި ވެސް ޑރ. ވަހީދު ވިދާޅުވެފައި ވަނީ ޕީޕީއެމަކީ ރާއްޖޭގައި އޮތް އެންމެ ބޮޑު ސިޔާސީ ޕާޓީކަމަށާއި އެކަމަކު ރިޔާސީ އިންތިހާބުގައި ވާދަކުރުމަށް ފުރުސަަތު ދީފައި ވަނީ މާ ކުޑަ ޕާޓީއަކަށް ކަމަށެވެ. އެއީ ލަދުގަންނަން ޖެހޭވަރުގެ ކަމެއްގެ ގޮތުގައި ސިފަކޮށް ޖުމްހޫރީ ޕާޓީއާއި ގުޅި ޑރ. ވަހީދު ގެންދަވަނީ ޕީޕީއެމާއި ޕާޓީގެ ލީޑާޝިޕަށް ވަރަށް ބޮޑަށް ފާޑުވިދާޅުވެ ވާހަކަ ދައްކަވަމުންނެވެ.
އެގޮތުން އެންމެ ފަހުން އޮތް ބައްދަލުވުމެއްގައި ޑރ. ވަހީދު ވަނީ ރައީސް ޔާމީނަށް ވެރިކަމަށް ކުރިމަތިލާން ޝަރުތު ހަމަނުވާކަމަށް ނިންމުމާއި އެކު ދެން އެ ފުރުސަތު ލިބޭނެކަމުގެ އުންމީދުގައި ހުންނެވިކަމަށް ހާމަކުރައްވާފަ އެވެ. އެކަމަކު ޓިކެޓު ނުދިނުން ޑރ. ވަހީދު ސިފަ ކުރެއްވީ ޕީޕީއެމަށް ވާދަކުރަން ފުރުސަތު ނުދީ، 10 އަހަރު ވަންދެން ޕާޓީއަށް ކުރި ހިދުމަތް ބަލައިނުގަތުން ގޮތުގަ އެވެ.
ޑރ. ވަހީދު ވިދާޅުވެފައި ވަނީ އެއީ އެއްވެސް ބަލާލުމެއް ނެތި، އިހުތިރާމެއް ވެސް ނެތި ޕާޓީން ނިންމި ނިންމުމެއް ކަމަށެވެ.
ޕީޕީއެމްގެ އެއްވެސް ކެންޑިޑޭޓަކަށް އިންތިހާބަށް ކުރިމަތިލުމުގެ ފުރުސަތު ނުދިން… އެހެންވީމަ އަޅުގަނޑަށް ގަބޫލުކުރެވުނީ 10 އަހަރު ވަންދެން އެތަނުގައި ހުރި އެއްވެސް އިހުތިރާމެއް، އެއްވެސް ބަލާލުމެއް ނެތި ކަންކަން އެގޮތަށް ދިޔައީމަ އަޅުގަނޑަކަށް ނުޖެހޭ އެތާކު ހުންނާކަށް. އަޅުގަނޑު ނުޖެހޭ އެއްވެސް ތާކު ހުންނާކަށް،
އަބްދުއްރަހީމް ވިދާޅުވީ، ޕީޕީއެމް/ޕީއެންސީއަކީ ވެސް ރައީސް ޔާމީންގެ ދެ ޕާޓީކަމަށެވެ. އެހެންކަމުން ރިޔާސީ ކެންޑިޑޭޓަކީ ރައީސް ޔާމީންގެ ތާއީދު އޮތް ކެންޑިޑޭޓަކަށްވުމުން އެހާ ހިސާބުން ކުރިޔަށް ދެވޭނެކަމަށް އަބްދުއްރަހީމް ވިދާޅުވި އެވެ. އެހެންކަމުން ބޭނުންވާހާ ކަމެއް އަދި ޕާޓީތެރެއިން ނުވެ ހިނގައިދާނެކަން ފާހަގަކޮށް އަބްދުއްރަހީމް ވިދާޅުވީ މުއިއްޒު ރިޔާސީ ޓިކެޓު ހޯއްދެވީ ވެސް ގަދަކަމުން ނޫން ކަމަށެވެ.
ޑރ. ވަހީދަށް ރައްދު ދެއްވައި، އަބްދުއްރަހީމް ވިދާޅުވީ ޕާޓީ ދޫކޮށް ގޮސް ދެން ސިޔާސަތުތަކަށް ފާޑުކިޔައި ޕީއެންސީއަކީ ކުޑަ ޕާޓީއެއްކަމަށް ސިފަކޮށް ވާހަކަ ދައްކަން ޖެހޭ ސަބަބެއް ނެތްކަމަށް އަބްދުއްރަހީމް ފާހަގަކުރި އެވެ. އެހެންކަމުން އެއް އިރެއްގައި އިލްމީ ގޮތުން ގާބިލުވީ ތީ ކުރީގައި ހުންނެވުމަކީ އެއީ އަބަދު އެ ސަފުގައި ހުންނާނެ ސަބަބެއް ނޫންކަމަށް އަބްދުއްރަހީމް ވިދާޅުވި އެވެ.
