މިނިސްޓްރީ އޮފް ހޯމް ލޭންޑް ސެކިއުރިޓީ އެންޑް ޓެކްނޮލޮޖީގެ ދަށުން ހިންގާ ހުރިހާ ޔުނިފޯމްޑް މުއައްސަސާތަކުގެ އަސާސީ ތަމްރީނު އެކައްޗަކަށް ހެދުމަށް އަމާޒު ހިފާފައިވާކަމަށް މިނިސްޓަރު އަލީ އިހުސާން ވިދާޅުވެއްޖެއެވެ.
ޕްރިޒަން އޮފިސަރުންގެ އަސާސީ ތަމްރީނު ޕްރޮގްރާމްގެ 28 ވަނަ ބެޗުގެ ދަސްވެނިވުމުގެ ރަސްމިއްޔާތުގައި ވާހަކަދައްކަވަމުން މިނިސްޓަރު ވިދާޅުވީ، ވިދާޅުވީ މުއައްސަސާއަކުން ތަމްރީނުކުރާ އޮފިސަރުންނަކީ އެ މުއައްސަސާއެއްގެ އެންމެ ބޮޑު އެއް ރައުސުލްމާލު ކަމަށާއި އެއިރެއްގަ ދެވެންއޮންނަ އެންމެ މޮޅު ތަމްރީނެއް އެ މުއައްސަސާއެއްގައި ތިބޭ އޮފިސަރުންނަށް ދެއްވުމަށްޓަކައި އެމަނިކުފާނު މަސައްކަތްކުރައްވާނެކަމަށޭވެ.
މިނިސްޓަރު ވިދާޅުވީ، ތަމްރީނުކުރާ އޮފިސަރުންނަކީ ވަކި ގޮތަކަށް ބައްޓަންކުރެވި، ގައުމާދޭތެރޭ ވަކި ގޮތަކަށް ދެކޭ، އިސްލާމް ދީނަށް ފުރިހަމައަށް ހުރުމަތްތެރިކޮށް ހިތާ ބައެއްގެ ގޮތުގައި ބިނާކުރެއްވުމަކީ އެމަނިކުފާނުގެ އަމާޒެއްކަމަށާއި ގާނޫނު ނެގެހެއްޓުމުގެ ފުރިހަމަ ގާބިލްކަން ލިބިފައިތިބި އޮފިސަރުން ބިނާކުރެއްވުމަށް މަސައްކަތްކުރައްވާނެކަމަަށް ވިދާޅުވިއެވެ.
އެމަނިކުފާނު ވިދާޅުވީ ސަލާމާތީ މުއައްސަސާތަކުގެ އޮފިސަރުންނަށް ކުރިމަތިވެގެންދަނީ ކުޑަ ހުރަސްތަކެއް ނޫންކަމަށާއި، ވަސީލަތްތައް މަދު ނަމަވެސް ޒިންމާތައް ބޮޑުކަމަށްވެސް ފާހަގަކުރެއްވިއެވެ. އެހެންކަމުން މަސައްކަތްތަކުގެ ތެރެއިން ކޮށްފައިވާ ހުވާ ހަނދާނުގައި ބަހައްޓަން އެމަނިކުފާނު އިލްތިމާސްކުރެއްވިއެވެ.
