އަންނަ އަހަރު ބާއްވާ ރައްޔިތުންގެ މަޖިލީހުގައި ވާދަކުރާ ކެންޑިޑޭޓުން ރައީސް އަބްދުﷲ ޔާމީން އަބްދުލްގައްޔޫމްގެ ފޮޓޯ ކެމްޕެއިން ޕޯސްޓަރުތަކުގައި ބޭނުން ނުކުރުމަށް ޕީޕަލްސް ނެޝަނަލް ފްރަންޓު (ޕީއެންއެފް) އިން އެދިއްޖެ އެވެ.
ޕްރޮގްރެސިވް ޕާޓީ އޮފް މޯލްޑިވްސް ދޫކުރައްވައި ރައީސް ޔާމީން އަލަށް އުފައްދާ ޕީއެންފްގެ ރެޖިސްޓްރޭޝަނަށް ބޭނުން ވާ ސޮއި ހަމަކުރުމަށް އިލެކްޝަންސް ކޮމިޝަނުން ވަނީ އެ ޕާޓީއަށް ހުއްދަ ދީފަ އެވެ. އެހެންވެ ސޮއި ހަމަކުރުމުގެ މަސައްކަތަށް ބައެއް ބޭފުޅުން މިވަގުތު ތިބީ ފުވައްމުލަކުގަ އެވެ.
މިހާތަނަށް އެ ޕާޓީން ކެންޑިޑޭޓެއްގެ ގޮތުގައި ޕްރޮމޯޓު ކުރަމުން ގެންދަވަނީ، ކުރިޔަށް އޮތް މާލޭގެ މޭޔަރުކަމުގެ އިންތިހާބުގައި ވާދަކުރައްވާ ކުރީގެ ކޮމިޝަނާރ އޮފް ޕޮލިސް ހުސެއިން ވަހީދެވެ. ޕާޓީ އުފެއްދުމުގެ މަސައްކަތް ފެށުނީއްސުރެ، ހުސެއިން ވަހީދު ހަރަކާތްތަކުން ފާހަގަކުރެވެ އެވެ. އަދި އެންމެ ފަހުން އީސީން ހުއްދަ ލިބުނު ދުވަހު ކޮމިޝަނުގެ ބޭރުގައި ހުންނަވައި މީޑިއާތަކަށް ދެއްވި މައުލޫމާތުތައް ޕީއެންއެފް އުފެއްދުމުގައި އިސްކޮށް އުޅުއްވާ މުހައްމަދު މަލީހު ޖަމާލު ވަނީ އެކަން އިއުލާނު ކުރައްވާފަ އެވެ.
ކުރިޔަށް އޮތް ރައްޔިތުން މަޖިލީހުގެ އިންތިޚާބުގައި ވާދަކުރައްވާ އެއްވެސް ކެންޑިޑޭޓަކަށް ރައީސް ޔާމީންގެ އެންޑޯސްމަންޓް ދެއްވާފައި ނުވާނެ .އެކިއެކި ބޭފުޅުން އެމަނިކުފާނުގެ ފޮޓޯފުޅު ކެންޕެއިންގައި މިވަގުތު ބޭނުންކުރުމަކީ މިޕާޓީއިން ރުހޭ ކަމެއް ނޫންކަމުގައި ދަންނަވަމެވެ.@PNFront pic.twitter.com/AxLn37Kcg2
— Mohamed Maleeh Jamal (@maleehjamal) December 2, 2023
މަޖިލީހުގެ އިންތިހާބަށް ރަސްމީކޮށް އަދި ހުޅުވާނުލާއިރު، ސިޔާސީ ޕާޓީތަކުގެ ޕްރައިމެރީތަކުގައި ވާދަކުރާނެކަން ދާއިރާތަކުގެ އެކި މީހުން ދަނީ އިއުލާނު ކުރަމުންނެވެ. އަދި އެ ޕާޓީއެއްގެ ލީޑަރުގެ ފޮޓޯތަކާއި، ލޯގޯތައް ވެސް ޕޯސްޓަރުގައި ބޭނުން ކުރެ އެވެ. އެކަން ފާހަގަކޮށް މިއަދު މަލީހު ކުރެއްވި ޕޯސްޓެއްގައި ވިދާޅުވީ ރައީސް ޔާމީން މަޖިލިސް އިންތިހާބަށް އެއްވެސް ކެންޑިޑޭޓެއް އެންޑޯޒް ނުކުރައްވާ ކަމަށެވެ. އެހެންކަމުން އެމަނިކުފާނުގެ ފޮޓޯ ކެމްޕެއިނަށް ބޭނުން ކުރުމަށް މިވަގުތު ނުރުހޭކަމަށް މަލީހު ވިދާޅުވި އެވެ.
— Nahula Ali (@nahu_ali) December 2, 2023
ނަހުލާ މަޖިލިސް އިންތިހާބުގައި ވާދަކުރާނެކަން އިއުލާނު ކުރިއިރު، މީގެ ދުވަސްތަކެއް ކުރިން އޭނާގެ ޕޯސްޓެއްގައި ވަނީ ރައީސް މުއިއްޒުގެ ސަރުކާރު ދެމެހެއްޓުމުގައި މަސައްކަތް ކުރައްވާނެކަމަށާއި، މިއީ އެތައް ރައްޔިތުންނެއްގެ އުންމީދާއި ގުޅިފައިވާ ވެރިކަމެއްކަމަށް ވިދާޅުވެފަ އެވެ. އެކަން ފާހަގަކޮށް މަލީހަށް ރައްދު ދެއްވައި ނަހުލާ މިރޭ ވިދާޅުވީ ޕީޕީއެމުން އޭނާ ވަކިކުރުމުން މިދިޔަ ދޮޅު އަހަރު އޭނާގެ އެކި ޕޯސްޓުތަކުގައި ބޭނުން ކުރަމުން އައީ ދަނބު ކުލައާއި ”އެން“ އަކުރު ޖެހި ލޯގޯއެއް ކަމަށެވެ. އަދި އޭނާ ބޭއްވި ރަސްމިއްޔާތެއްގައި އެ ލޯގޯއާއި ކުލަ ވެސް އިފްތިތާހު ކުރިކަން ފާހަގަކުރެެއްވި އެވެ.
ވިލިމާލޭގެ އަވަށުގެ ކުލައަކީ ދަނބު ކުލަކަން ފާހަގަކުރައްވައި ނަހުލާ ވިދާޅުވީ އެއީ ރައީސް ޔާމީންގެ ޕާޓީގެ ކުލަކަމަށް ވިދާޅުވެ މަލީހު އޭނާގެ ފޮޓޯ ސޯޝަލް މީޑިއާގައި ޖެހި ނަމަވެސް ޕޯސްޓަށް އެއްވެސް ބަދަލެއް ނުގެންނާނެ ކަމަށެވެ. އަދި ކެމްޕެއިން ކުރުމުގައި ދަނބު ކުލަ ބޭނުން ކުރާނެކަމަށް ވެސް ވިދާޅުވި އެވެ.
