މާލޭ ސިޓީގެ މަގުތަކުގައި ޑަސްޕިން ހުރި ނަމަވެސް އެކަށީގެންވާ ވަަރަށް ޑަސްޕިން ނެތް ކަމަށް ޑިމޮކްރެޓްސްގެ ފަރާތުން މޭޔަރުކަމަށް ވާދަކުރައްވާ ކެންޑިޑޭޓް ސައިފް ފާތިހް ވިދާޅުވެއްޖެއެވެ.
ސަންގު ޓީވީން ގެނެސްދޭ ސަންގު މޭޔަރު ބަހުސް ގައި ސައިފް ވިދާޅުވީ މާލޭގެ ކުނީގެ މައްސަލަ ފާހަގަކުރުމުގައި އެންމެ މުހިންމު ކަމަކީ ވެމްކޯ މާލޭ ސިޓީގެ ކައުންސިލްގެ ދަށަށް ގެނައުން ކަމަށެވެ. ކުރީގެ މޭޔަރު އަދި މިހާރުގެ ރައީސް ޑރ. މުހައްމަދު މުއިއްޒު ވެސް އެކަމަށް ތަކުރާރުކޮށް ވަކާލާތު ކުރައްވަމުން ގެންދެވި ކަމަށް ސައިފް ވިދާޅުވިއެވެ.
އެންމެ މުހިންމު އެއްކަމަކީ ވެމްކޯ މާލޭ ސިޓީގެ ކައުންސިލްގެ ދަށަށް ގަނައުން
ސައިފް ވިދާޅުވީ މުނިސްޕަލް ހިދުމަތްތައް ދިނުމަކީ ސީޓީ ކައުންސިލްގެ ޒިންމާއެއްކަމަށާއި އަދި ކައުންސިލްގެ ބާރު ނުފޯރާ ގޮތަށް އެ ހިދުމަތްތައް ދިނުމަކީ މާލެ ސިޓީ ބެލެހެއްޓުމަށް ވަރަށް ދަތިތަކެއް ކުރިމަތި ވެގެން ދާކަމެއް ކަމަށެވެ.
ކުނި ލޮރީ ބާއްވާ ޖާގަތަކަކީ ވަރަށް ހަޑި ތަންތަންކަމަށާއި އެހެންކަމުން އެތަން ތަނަކީ ކޮންމެ ދުވަހަކުވެސް ޑިސްއިންފެކެޓް ކުރަން ޖެހޭ ތަންތަން ކަމަށް ސައިފް ވިދާޅުވިއެވެ. މީގެއިތުރުން ޑަސްޕިންތައް މަގުތަކާއި، ތޮށި މައްޗާއި، ޕާކު ތަކާއި، އަދި މައިޒާން ތަކުގައި ބަހައްޓަން ޖެހޭ ކަމަށް ސައިފް ވިދާޅުވިއެވެ. މާލޭގައި ޑަސްޕިން ހުރި ނަމަވެސް އެކަށީގެންވާ ވަރަށް ޑަސްޕިން ނެތް ކަމަށާއި އެހެންކަމުން މަގުމަތީގައި ހިނގާފައި ދާއިރު ކުނިކޮޅެއް އެއްލާލަން ޑަސްޕިންއެއް ނުފެންނަ ކަމަށް ވިދާޅުވިއެވެ.
ސައިފް ވިދާޅުވީ އޭނާގެ މޭޔަރުކަމެއްގައި މާލޭގައި އެ ޑަސްޕިންތައް ބަހައްޓާ މާލޭ އަކީ ތާހިރު އަދި ސާފުތަނަކަށް ހަދާނެ ކަމަށެވެ.
