ޗައިނާއާއި ދެމެދު ކުރެވުނު މަޝްވަރާތަކުން ރާއްޖޭގެ އިގްތިސާދު އިތުރު ހަރުފަތަކަށް ގެންދެވޭނެކަމުގެ ޔަގީންކަން އެބައޮތްކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ.
ޗައިނާގެ ރައީސް ޝީ ޖިންޕިންގެ ދައުވަތަކަށް އެ ގައުމަށް ވަޑައިގެން ހުންނެވި ރައީސް މުއިއްޒާއި އެމަނިކުފާނުގެ ކެބިނެޓު ބައެއް ވަޒީރުންގެ މެދުގައި ރާއްޖޭގައި ހުރި އިންވެސްޓްމަންޓު ފުރުސަތުތަކާއި، އިގްތިސާދީ ނަފާގެ ދާއިރާއިން މަޝްވަރާކޮށްފަ އެވެ. އެގޮތުން އިކޮނޮމިކް މިނިސްޓަރ މުހައްމަދު ސައީދާއި، ކޮންސްޓްރަކްޝަން މިނިސްޓަރ ޑރ. އަބްދުﷲ މުއްތަލިބު ވަނީ ސަރުކާރުން ރާވާފައިވާ ބޮޑެތި މަޝްރޫއުތައް ފާހަގަކުރައްވައި އެކަމަށް ހުރި ފުރުސަތުތައް ހުށަހަޅުއްވާފަ އެވެ.
، ދިވެހިރާއްޖެއާއި ޗައިނާއާ ދެ ޤައުމުގެ ސަރުކާރުގެ މެދުގައި ކުރިއަށް ގެންދިއުމަށް ހަމަޖެހިފައިވާ ރަސްމީ މަޝްވަރާތައް މި ދެ ދުވަހު ކުރިޔަށް ދިޔަ އެވެ. ރައީސް މުއިއްޒާއި، ޝީގެ ވާހަކައިގައި ވަނީ ދެ ގައުމު ގުޅިގެން އެކުގައި މަސައްކަތް ކުރުމުގެ މުހިންމުކަން ފާހަގަކުރައްވާފަ އެވެ.
ސްޓޭޓް ކައުންސިލް އޮފް ދަ ޕީޕަލްސް ރިބަލްބިކް އޮފް ޗައިނާއާއި ބައްދަލު ކުރައްވައި މިއަދު ރައީސް ވިދާޅުވީ ޗައިނާއިން ދިވެހިރާއްޖެއާއި މެދު ބާއްވާ ގާތް ގުޅުމަށް ޝުކުރު އަދާކުރައްވާ ކަމަށެވެ. ކުރިޔަށް އޮތީ އިގްތިސާދީ ގޮތުން ރާއްޖެއަށް ކުރިއެރުންތައް ލިބޭނެ ދުވަސްތަކެއްކަމަށާއި، އެކަމުގައި ޗައިނާގެ އެހީއާއި އެއްބާރުލުން ލިބޭނެކަމުގެ ފުރިހަމަ ޔަގީންކަން އެބައޮތްކަމަށް ރައީސް ވިދާޅުވި އެވެ.
ޗައިނާގެ އެހީތައް އެކި ގޮތްގޮތުން ރާއްޖެއަށް އަބަދުވެސް ލިބޭކަމަށާއި، އެއީ ކޮންމެ ދާއިރާއަކަށް ބެލި ނަމަވެސް ކުރިއެރުމެއްކަމަށް އެމަނިކުފާނު ވިދާޅުވި އެވެ. ރައީސް ވިދާޅުވީ ބޯހިޔާވަހިކަމުގެ ދާއިރާއާއި، ތައުލީމީ ފުރުސަތުތައް ފަހިކޮށްދިނުމަށް ޗައިނާއިން އަބަދުވެސް އެހީތެރިކަން ފޯރުކޮށްދޭ ކަމަށެވެ.
މީގެއިތުރުން ރާއްޖޭގެ ފަތުރުވެރިކަމަށް ޗައިނާގެ ހިއްސާ ބޮޑުކަން ފާހަގަކުރައްވައި ރައީސް ވަނީ، މާކެޓުތައް އިތުރަށް ފުޅޭ ކުރެވޭނެ ގޮތްތަކާއި ގުޅޭގޮތުން މަޝްވަރާ ކުރުން މުހިންމުކަމަށް ވިދާޅުވެފަ އެވެ.
ރައީސް ވަނީ މިއީ އެމަނިކުފާނުގެ ފުރަަތަމަ ރަސްމީ ދަތުރުކަމަށާއި ދެ ގައުމުގެ ދެމެދުގައި އޮތް ގުޅުން އިތުރަށް ބަދަހިވެ މަޝްވަރާތަކަށް ފުރިހަމަކަމެއް ލިބިގެންދާނެކަމަށް ވިދާޅުވެފަ އެވެ.
މި ދަތުރުފުޅުގައި، ގިނަ ދާއިރާތަކުން އެކުގައި މަސައްކަތް ކުރުމަށް އެބައްވެފައިވާއިރު، އެކަންކަން ކުރިޔަށް ގެންދިއުމަށް އެއްބާރުލުން ދެއްވާނެކަމުގެ ޔަގީންކަން ރައީސް އެރުވި އެވެ.
ދިވެހިރާއްޖެއާއި ޗައިނާއާ ދެމެދުގައި ބޭއްވެވި ރަސްމީ ވާހަކަފުޅުގައި ދެ ލީޑަރުން ދެއްކެވި ވާހަކަފުޅުގައި، ކުރިއަށް އޮތްތަނުގައި ދެ ޤައުމުގެ ގުޅުން އިތުރަށް ވަރުގަދަކުރެއްވުމުގެ އުއްމީދު އައުކުރެއްވިއެވެ.
މި ބައްދަލުވުމަށްފަހު ތަފާތު އެކި ދާއިރާތަކުން މައިގަނޑު 20 އެއްބަސްވުމެއްގައި ދެ ޤައުމުން ވަނީ ސޮއިކޮށްފައެވެ. މި އެއްބަސްވުންތަކުގައި ސޮއިކުރެއްވުމުގެ ރަސްމިއްޔާތުގައި ދެ ޤައުމުގެ ރައީސުން ބައިވެރިވެވަޑައިގެންނެވިއެވެ.
