ބޮޑުތަކުރުފާނުމަގުގައި މަގުމައްޗަށް ބައެއް ވާގޮތަށް ބަހައްޓާފައިވާ ސްޓެލްކޯގެ ފިއުލް ޕަމްޕު ސްޓޭޝަން އެތަނުން ނަގައި، އެދިމާ ފަޅުން ބައެއް ހިއްކުމަށްފަހު، އެތަނުގައި އައު ފިއުލްޕަމްޕު ސްޓޭޝަނެއް ގާއިމް ކުރުމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އަށް ހަވާލުކޮށްފި އެވެ.
އެއްބަސްވުމުގައި ސޮއި ކުރުމަށް މިއަދު ބޭއްވި ރަސްމިއްޔާތުގައި ސްޓެލްކޯގެ މެނޭޖިން ޑިރެކްޓަރ ހުސެއިން ފަހުމީ ވިދާޅުވީ ރައްޔިތުންނަށް ދިމާވެފައިވާ ދަތިތައް ހައްލު ކުރުމަށް ސްޓެލްކޯގެ މެންޑޭޓުގެ ތެރެއިން ކުރެވެން ހުރި ކަންކަން ކުރުމަށް ހާއްސަ އިސްކަމެއް ދީފައިވާކަމަށެވެ. އެގޮތުން ބޮޑުތަކުރުފާނު މަގުގައި ހުރި ޕަމްޕް ސްޓޭޝަން ނަގައި، މޫދު ސަރަހައްދު ހިއްކުމަށް ފަހު އެތަނަށް ބަދަލު ކުރުމުގެ މަސައްކަތް ފަށާފައިވާކަމަށް ފަހުމީ ވިދާޅުވި އެވެ.
މި މަސައްކަތް އެމްޓީސީސީއާއި ހަވާލުކޮށް ފަހުމީ ވިދާޅުވީ ރައްޔިތުންނަށް ފަސޭހަކޮށްދިނުމުގެ ގޮތުން މިހާރު ވެސް ގިނަ މަސައްކަތްތައް ކުރެވިފައިވާކަމަށެވެ. ރައްޔިތުންގެ މައިގަނޑު ޝަކުވާތަށް ދެނެގަނެވިފައިވާކަން ފާހަގަކުރައްވައި ފަހުމީ ވިދާޅުވީ ކުންފުނިން ބޭނުންވަނީ އެ ހުރިހާކަމެއް ހައްލު ކުރުމަށް ކަމަށެވެ.
ދެން އަޅުގަނޑުމެން އިރާދަކުރެއްވިއްޔާ މި ޕަމްޕް ސްޓޭޝަން ނެގުމަށްފަހުގަ ދެން އެންމެ ފުރަތަމަ ހުޅުވާލެވޭނީ ވެސް ހަމަ ރައްޔިތުންނަށް އަޅުގަނޑުމެންނަށް ލިބިފައި ހުރި ޝަކުވާތަކުގެ ތެރެއިން މިހިސާބުގަނޑުގައި ހުރި ދުއްވާތަކެއްޗަށް ފަސޭހަވާގޮތަށް މަގު ހުޅުވާލަދިނުން، އެ މަސައްކަތް އެބަދޭ..
ޕަމްޕް ސްޓޭޝަން ނެގުމަށް ހަރަދުތަކެއްދާއިރު، އެކަމަށް ފަހުމީ ވިދާޅުވީ ބަޖެޓުން ހަތް މިލިއަން ރުފިޔާ ހަރަދުވާނެ ކަމަށެވެ. އަމާޒަކީ 60 ދުވަހުގެ ތެރޭގައި ޕަމްޕް ސްޓޭޝަން ނަގުން ނަމަވެސް ދިމާވާ ދަތިތަކެއް އެބަހުރިކަމަށް އޭނާ ވިދާޅުވި އެވެ.
އެގޮތުން އީއައިއޭ އެޕްރޫވްވުމާއި، އެ ނޫންވެސް ކަންކަން އޭގެ ތެރޭގައި ހިމެނޭކަމަށް ފަހުމީގެ ވާހަކައިގައި ވިދާޅުވި އެވެ.
މިއަދުގެ ރަސްމިއްޔާތުގައި އެމްޓީސީސީގެ ސީއީއޯ އަދި މެނޭޖިން ޑިރެކްޓަރު އަބްދުﷲ ޒިޔާދު ވިދާޅުވީ މިއީ ކުރަން ބޭނުންވެ، އެކަމަކު އަމަލީ ގޮތުން މަސައްކަތް ނުފެށި އޮތް ޕްރޮޖެކްޓެއް ކަމަށެވެ.
އެހެން ނަމަވެސް މި ސަރުކާރުގައި މި ޕްރޮޖެކްޓު ކުރިޔަށް ގެންދިއުމަށް ވާހަކަ ދެކެވުނުތާ، މަހެއް ނުވަނީސް އަމަލީ މަސައްކަތް ފެށިގެން ދިއުމަކީ އެއީ ރައްޔިތުންނަށް ދިމާވާ ދަތިތައް ހައްލު ކުރުމަށް ދޭ ސަމާލުކަން އެނގޭ އެއް ސަބަބުކަމަށް ފާހަގަކުރެއްވި އެވެ.
ޒިޔާދު ވިދާޅުވީ އެންވައިރޮމެންޓަލް ޕްރޮޓެކްޝަން އޭޖެންސީ (އީޕީއޭ) ގެ ހުއްދަ ލިބޭތާ ދެ މަސް ދުވަހުގެ ތެރޭގައި މަސައްކަތް ނިންމާލެވޭނެކަމަށް ލަފާ ކުރެވޭ ކަމަށެވެ. ޒިޔާދު ވިދާޅުވީ ކުރަން ޖެހޭ ވަރަށް ގިނަ މަސައްކަތްތައް ހުރިއިރު، ސާވޭ ހެދުމާއި ޝީޓް ޕައިލްކޮށް ޕްލެޓްފޯމް ގާއިމުކޮށް ސްޓްރަކްޗާގެ މަސައްކަތް ކުރިޔަށް ގެންދަން ޖެހޭކަމަށެވެ. ޕޭވިން ރަނގަޅުކޮށް، މެޝިނަރީސްތައް ގެންދާނީ އޭގެ ފަހުންކަމަށް ޒިޔާދު ވިދާޅުވި އެވެ.
ހައިވޭ ބޭނުން ކުރުމުގައި ލުއިތަކެއް މީގެ ސަބަބުން ލިބިގެންދާނެކަމަށާއި، ޕްލޭނާއި އެއްގޮތަށް މަސައްކަތް ކުރިޔަށް ދާނެކަމުގެ ޔަގީންކަން ޒިޔާދު ދެއްވި އެވެ.
މީގެއިތުރުން ފަހުމީ ވަނީ، މަސައްކަތް ކުރިޔަށް ގެންދިޔަ ނަމަވެސް ހިދުމަތް ދިނުމަށް އެއްވެސް ހުރަހެއް ދިމާނުވާނެ ކަމަށެވެ
ބޮޑުތަކުރުފާނު މަގުގައި ހުރި ސްޓެލްކޯގެ ފިއުލްޕަމްޕް ސްޓޭޝަން އެތަނުން ނެގުމުގެ މަސައްކަތުގެ މަސައްކަތް ފަށައި، ރަސްމީ ބައްދަލުވުންތައް ވެސް ކުރިޔަށް ގެންދިޔަ އެވެ. މިއީ ސަރުކާރުގެ ފުރަތަމަ 100 ދުވަހުގެ ވައުދަކަށްވާއިރު، މަސައްކަތް އެމްޓީސީސިއާ ހަވާލު ކުރުމަށް ނިންމީ ސްޓެލްކޯއިން ބުނި ގޮތުގައި އެ ކުންފުންޏަކީ އެފަދަ މަސައްކަތް ކުރުމުގެ ތަޖުރިބާ ހުރި ކުންފުންޏަކަށްވުމެވެ.
