ކުރީގެ ރައީސް އަބްދުﷲ ޔާމީން އަބްދުލްގައްޔޫމަށް ރިޔާސީ އިންތިހާބުގައި ވާދަކުރުމުގެ ފުރުސަތު ގެއްލުވާލައި، އެމަނިކުފާނުގެ އިސްތިއުނާފު ހައިކޯޓަށް ހުށަހެޅުން ލަސްކުރީ އެމަނިކުފާނުގެ ގާނޫނީ ވަކީލު ޑރ. މުހައްމަދި ޖަމީލު އިސްވެ ހުންނަވައި ވެރިކަމުގެ ދަހިވެތިކަމަށް ހިންގެވި ކަންތަކެއްގެ ސަބަބުންކަމަށް ވެރިކަން ކުރާ މައި ޕާޓީ ޕީއެންސީގެ ޗެއާޕާސަން އަބްދުއްރަހީމް އަބްދުﷲ ވިދާޅުވެއްޖެ އެވެ.
ރައީސް ޑރ. މުހައްމަދު މުއިއްޒާއި، ޕީޕީއެމް/ޕީއެންސީގެ ލީޑާޝިޕް ދެމެދު ޖެހުނު މައްސަލަތަކަށް ފަހު ރައީސް ޔާމީން ވަނީ ކޮންގްރެސް ކޯލިޝަން ދޫކުރައްވައި އައު ޕާޓީއެއް އުފެއްދެވުމުގެ މަސައްކަތް ފައްޓަވާފަ އެވެ. އެކަމުގައި އެމަނިކުފާނުގެ އެންމެ އަރިހުގައި ހުންނެވީ ޖަމީލާއި، ކުރީގެ ކޮމިއުނިކޭޝަން މިނިސްޓަރު މަލީހު ޖަމާލެވެ. ރައީސް ޔާމީންގެ ވެރިކަން ބަދަލު ކުރުމަށް އެންމެ ބޮޑަށް މަސައްކަތް ކުރެއްވި ދެ ބޭފުޅުން ވެސް މަސައްކަތް ކުރަނީ ރައީސް ޔާމީންގެ ސިޔާސީ ކެރިއަރު ހަލާކުކޮށްލަންކަމަށް ސަރުކާރު މެމްބަރުން ތުހުމަތު ކުރެ އެވެ.
އެކި ޖަލްސާތަކުގައި މި މައުޟޫއުއަށް ވާހަކަތައް ދެކެވޭއިރު، ރައީސް ޔާމީން އުފައްދަވާ ޕީއެންއެފްގެ އޮފީސް ޖަލްސާތަކުގައި ފަހަކަށް އައިސް ރައީސް މުއިއްޒަށް އަމާޒު ކުރާ ފާޑުކިއުން ވަނީ އިތުރުވެފަ އެވެ. އެ ވާހަކަތަކަށް ރައްދު ދެއްވައި، ރޭ މަހިބަދޫގައި އޮތް ޖަލްސާއެއްގައި އަބްދުއްރަހީމް ވިދާޅުވީ އޭނާ އަބަދުވެސް މަސައްކަތް ކުރީ ގައުމުގެ ހައްގުގައި ކަމަށެވެ.
2018 ގެ ރިޔާސީ އިންތިހާބުގެ ނާކާމިޔާބީއާއި އޭގެ ޖެހިގެން އައި އަހަރު އޮތް 19 ވަނަ މަޖިލިސް އިންތިހާބުގައި މަދު އަދަދެއްގެ ގޮނޑި ޕީޕީއެމް/ޕީއެންސީއަށް ލިބި މިދިޔަ ފަސް އަހަރު ހޭދަކުރަން ޖެހުނީ އަބްދުއްރަހީމް ވިދާޅުވި ގޮތުގައި ވަރަށް ދަތިހާލާއި އުނދަގުލުގަ އެވެ. އަދި ވިދާޅުވީ ޕާޓީ މަގުމަތިވެ މަސައްކަތް ކުރަން ޖެހުނު ހާލު މިއަދާއި ހަމައަށް ވެސް ޕާޓީގެ އިސް ސަފުގައި ތިއްބެވި ބޭފުޅުންނަށް ވަރަށް ސާފުކޮށް އެނގިވަޑައިގަންނަވާނެކަމަށެވެ.
އޭރު އިދިކޮޅު ޕާޓީއެއްގެ ގޮތުގައި ކުރި މުޒާހަރާތަކުގައި އިނގިލިން ގުނާލެވޭހާ މަދު ބަޔަކު ބައިވެރިވަމުން ދިއުމުގެ ސަބަބުން މަލާމާތް ކުރުމަށް އެއީ ”ދެދޮރު ދޭތެރެ މުޒާހަރާ“ ކަމަށް ބުނެ ޖެއްސުން ކުރިކަމަށް އަބްދުއްރަހީމް ވިދާޅުވި އެވެ. އެފަދަ ބަސްތަކަށް އެއްވެސް ފަރުވާލެއް ނެތި، ދިވެހިންގެ ރާއްޖެ އަލުން އަނބުރާ ހޯދަން މަސައްކަތް ކުރީ ހިތްވަރު އެލުވާނުލައިކަމަށާއި ނަތީޖާއަކަށް ވެގެން ދިޔައީ ދުވަސްވާ ވަރަކަށް އާންމުންގެ ބައިވެރިވުން ހަރަކާތުގައި އިތުރުވުމުންކަމަށް އޭނާ ވިދާޅުވި އެވެ.
މި މަސައްކަތުގެ ތެރެއިން އަބްދުއްރަހީމް ވިދާޅުވި ގޮތުގައި މަގުމަތި ވެދާނެހެން ހީވާ އެތައް ހާލަތެއް ކުރިމަތިވި އެވެ. އިތުރު ފަސް އަހަރާއި އެކު ޖުމްލަ 10 އަހަރު މަގުމަތީ އުޅެން ޖެހުން އެއީ އާދައިގެ ވާހަކައެއް ނޫންކަމަށާއި، އެހެން ކަމުން އެ ހާލަތަށް ގައުމު ދާން އެއްވެސް ގޮތަކަށް ބޭނުން ނުވިކަމަށް އޭނާ ވިދާޅުވި އެވެ. އެހެން ނަމަވެސް، އެކި ގޮތްގޮތުން ވެރިކަމުގެ ދަހިވެތިކަން ހުރި ބަޔަކު ވަށައިގެން ތިބެ އެ ހާލަތަށް ޕާޓީ ވައްޓާލަން އުޅުނުކަމަށް އަބްދުއްރަހީމް ވިދާޅުވި އެވެ.
ރައީސް ޔާމީންގެ ވެރިކަމުގައި ނައިބު ރައީސަކަށް ހުންނަވައި، އެމަނިކުފާނުގެ ވެރިކަން އޭރުގެ އިދިކޮޅު އެމްޑީޕީއާއި ކޯލިޝަން ޕާޓީތަކާ ގުޅިގެން ބަޣާވާތަކުން ބަދަލު ކުރަން އުޅުނިކމުގެ ތުހުމަތުގައި ޖަމީލު ވަކި ކުރުމުން އެންމެ ބޮޑު ސީރިއަސް ތުހުމަތުތައް އެމަނިކުފާނަށް ކުރެއްވި އެކަކީ ޖަމީލެވެ. އޭރު ޖަމީލް ވަނީ އެމްޑީޕީގެ ރައީސްގެ މަގާމުގައި ހުންނެވި، ކުރީގެ ރައީސް މުހައްމަދު ނަޝީދާ ގާތުން މަސައްކަތް ކުރައްވައި ހިޔާނާތާއި ވައްކަމުގެ އަދި އެހެނިހެން ތުހުމަތުތައް ރައީސް ޔާމީނާއި އެމަނިކުފާނުގެ އާއިލާގެ ބޮލުގައި އަޅުއްވާފަ އެވެ.
އޭރު ރައީސް ޔާމީނަށް ޖަމީލު ކުރި ތުހުމަތުތަކާއި، ކިޔުއްވި ފާޑުކިއުންތަކުގެ މާބޮޑު ތަފްސީލަކަށް ނުދިޔަ ނަމަވެސް އެކަން ފާހަގަކުރައްވައި އަބްދުއްރަހީމް ވިދާޅުވީ ފެށުނީއްސުރެ އެފަދަ ބޭފުޅުން މަސައްކަތް ކުރީ ވެރިކަމުގެ ދަހިވެތިކަމުގައި ކަމަށެވެ. ރައީސް ޔާމީންގެ ވަށައިގެން މިއަދު އެފަދަ ބޭފުޅުން ތިއްބެވި އިރު، އެމަނިކުފާނު މިނިވަން ނުވެ ހުރީ ޖަމީލުގެ ސަބަބުންކަމަށާއި ރައީސް ޔާމީނަށް ދަށު ކޯޓުން އިއްވި ހުކުމް އިސްތިއުނާފު ނުކޮށް ޖަމީލު ލަސް ކުރީ ގަސްތުގައިކަމަށް އަބްދުއްރަހީމް ވިދާޅުވި އެވެ.
އަޅުގަނޑުމެންނަށް މަލާމާތަށް ބައެއް މީހުން ބުނީ ދެދޮރު ދޭތެރޭ މުޒާހަރާއޭ.. ހަތަރު މީހުން.. ފަސް މީހުން ގޮވައިގެން މުޒާހަރާ ކުރީ.. ކޮންފަދަ ދަތި ހާލަތެއްގައި ތޯ އަޅުގަނޑުމެން އުޅުނީ.. އެކަމަކު ހަމަ ހިތްވަރު ދޫނުކޮށް އަޅުގަނޑުމެން ހަމަ މަސައްކަތް ކުރީ.. އަޚުގަނޑުމެންގެ ރާއްޖެ އަލުން އަނބުރާ ހޯދަން.. އެ ކުރި މަސައްކަތުގެ ތެރޭގައި ވަކި ހިސާބަކަށް ދިޔައިރު އަޅުގަނޑުމެން އަނެއްކާ ވެސް ފަސް އަހަރަށް މަގުމައްޗަށް ދާން ޖެހިދާނެކަމުގެ ބިރު ހީވި ކިތަންމެ ފަހަރެއް އައި.. އެކަން އަޅުގަނޑުމެން ލައްވައި ކުރުވަން ވެރިކަމުގެ ދަހިވެތިކަމުގައި.. ފެށުނީއްސުރެ އެ އުޅޭ ބޭފުޅުން މަސައްކަތް ކުރެއްވީ.. މިއަދު ވަށައިގެން އެ ތިއްބެވީ އެބޭފުޅުން.. ހަގީގަތަކީ އެބޭފުޅުންގެ ނުބައި ނުލަފާ ރޭވުމުގެ ސަބަބުން އަޅުގަނޑުމެންގެ ކުރީގެ އިއްޒަތްތެރި ރައީސުލްޖުމްހޫރިއްޔާ ރައީސް ޔާމީން ބަންދުގައި އަދިވެސް އެ ހުންނެވީ… ޑރ. ޖަމީލުގެ ހީލަތްތެރިކަމުން.. ވެރިކަމަށް އޮތް ދަހިވެތިކަމެއްގެ ދަށުން، އެމަނިކުފާނުގެ އިސްތިއުނާފު ލަސްކުރީ.. މިއީ ހަގީގަތަކީ.. ސިޔާސީ ޕޯޑިއަމެއްވީމަ މިހާ ތިލަކޮށް ދިޔައީ… ތިބޭފުޅުން ގަބޫލު ކުރައްވާ އެންމެ ފަހުވަގުތާ ޖެހެންދެން އަޅުގަނޑުމެން ތިބީ.. އަޅުގަނޑުމެންގެ ކެނޑިޑޭޓު ނިންމައިގެން..
އަބްދުއްރަހީމް ވިދާޅުވީ ކޮންގްރެސް ކޯލިޝަން އެންމެ ފަހު ވަގުތާ ޖެހެން ދެން ވެސް އޮތީ ރައީސް ޔާމީންގެ ހައްގުގައި، ޕާޓީގެ ކެންޑިޑޭޓަކީ އެމަނިކުފާނުކަމަށް ކަނޑައަޅައިގެން ކަމަށެވެ. އެހެން ނަމަވެސް ސުޕްރީމް ކޯޓުގެ ފަހުގެ ނިންމުމާއި އެކު ދެން އެޅޭނެ ފިޔަވަޅެއް ނެތުމުން އިންތިހާބު ބޮއިކޮޓުކޮށް ރައްޔިތުން ނިކަމެތި ކުރަންވީ ސަބަބެއް ނެތްކަމަށް އަބްދުއްރަހީމް ވިދާޅުވި އެވެ. އޭރު ވެސް ރައީސް ޔާމީންގެ އިރުޝާދު ލިބިފައި އޮތީ، އަބްދުއްރަހީމް ވިދާޅުވި ގޮތުގައި ޕްލޭން އޭ، ޕްލޭން ބީ، ޕްލޭން ސީ އެއް ހޯދައި އެއާއި އެއްގޮތަށް ކުރިޔަށް ދިއުމަށެވެ. އެހެންކަމުން، ގައުމު އިސްކޮށް ރައީސް ޑރ. މުއިއްޒާއި އެކު ކުރިޔަށް ދާން ނިންމީކަމަށް އޭނާ ވިދާޅުވި އެވެ.
ސުޕްރީމް ކޯޓުން ނިންމީ ކުރިމަތި ނުލެވޭނެކަމަށް.. ބޮއިކޮޓެއް އަޅުގަނޑުމެންނަކަށް ނުކުރެވޭނެ.. އެއީ ތިބޭފުޅުން ވެސް ބޭނުމެއް ނުވޭ ބޮއިކޮޓް ކުރާކަށެއް.. ބޮއިކޮޓު ކުރިނަމަ އަދިވެސް އަޅުގަނޑުމެން ތިބެން ޖެހޭނީ މަގުމަތީގަ.. އެހެންވީމާ ބޮއިކޮޓުނުކޮށް އަޅުގަނޑުމެން ރިޔާސީ އިންތިހާބުގައި ކުރިޔަށް ދާން ނިންމީ، އަޅުގަނޑުމެންގެ އޭރުގެ ލީޑަރު ވިދާޅުވި ގޮތަށް.. ޕްލޭން އޭ، ބީ، ސީ އާ.. ހޯދީ އަޅުގަނޑުމެންގެ އޭރުގެ ލީޑަރު ވިދާޅުވި ގޮތަށް… ހިޔާނަތްތެރިއެއް ނުވަން… ބޭވަފާތެރިއެއް ވެސް ނުވަން.. އިހުލާސްތެރިކަމާ ތެދުވެރިކަމާ އެކު އަޅުގަނޑުމެން މަސައްކަތް ކުރީ.. ގައުމު މުހިންމުވީމާ އަޅުގަނޑުމެންނަށް މަޖުބޫރުވީ.. ބޮއިކޮޓު ނުކޮށް ޑރ. މުއިއްޒުއާއި އެކީ ކުރިޔަށް ދާން.. މިއީ ހަގީގަތަކީ.. ދެން މި ވާހަކަ އިތުރަށް ދައްކާނެ ގޮތެއް އަޅުގަނޑަކަށް ނޭނގޭ..
އަބްދުއްރަހީމް ވަނީ، މީގެ ކުރިން ވެސް ޖަމީލާއި މަލީހުއަަށް ވަރަށް ބޮޑަށް ފާޑުވިދާޅުވެ ވާހަކަ ދައްކަވާފަ އެވެ. އަދި ދެބޭފުޅުންގެ އިހުލާސްތެރިކަމާއި މެދު ސުވާލު އުފައްދައި ޕާޓީގެ ލީޑާޝިޕްގެ އެހެން ބޭފުޅުން ވެސް އެކި ޖަލްސާތަކުގައި ވާހަކަ ދެއްކެވި އެވެ.
ފަހަކަށް އައިސް ޖަމީލު ގެންދަވަނީ، ސަރުކާރާއި ރައީސް މުއިއްޒުގެ އާއިލާއަށް ވެސް ނިސްބަތްވާ ގޮތަށް ތުހުމަތުތައް ކުރައްވަމުންނެވެ. އަދި ކެބިނެޓަށް އައްޔަނު ކުރި ވަޒީރުންނަކީ ޕާޓީގެ ހަރަކާތްތަކުގައި އެއްވެސް ވަރަކަށް އުޅެފައި ނުވާ އަދި ދުވަހަކު މުޒާހަރާއެއްގައި ވެސް ބައިވެރި ނުވާ ބޭފުޅުންކަމަށް ވިދާޅުވެފަ އެވެ. އެގޮތުން އެންމެ ފަހުން ބޭއްވި ފްރަންޓް އޮފީސް ޖަލްސާގައި އޭނާ ވަނީ ހަޔާރ އެޑިއުކޭޝަން މިނިސްޓަރ ޑރ. މަރިޔަމް މާރިޔާ، އެގްރިކަލްޗާރ މިނިސްޓަރ ޑރ. އައިޝަތު ރަމީލާ އެއީ ދުވަހަކު ފޮޓޯއަކުން ވެސް ފެނިފައި ނުވާ ބޭފުޅުންކަމަށް ވިދާޅުވެ ވާހަކަ ދައްކަވާފަ އެވެ.
