ރ. މީދޫއަށް އީދު ޝޯއެއް ދޭން ގޮސްތިބި ގުރޫޕަކަށް ނިސްބަތްވާ މީހަކު އެ ރަށުގެ މިސްކިތެއްގައި ޓިކްޓޮކް ކުޅުނު މައްސަލައެއް ފުލުހުން ތަހުގީގު ކުރަން ފަށައިފިއެވެ.
މީޑިއާތަކަށް ފޮނުވި މެސެޖެއްގައި ފުލުހުން ބުނީ، މީދޫގެ މިސްކިތެއްގައި ޓިކްޓޮކް ކުޅުނު މައްސަލައެއް އެ މުވައްސަސާގެ ސަމާލުކަމަށް އައިސްފައިވާކަމަށެވެ.
މިސްކިތުގައި ޓިކްޓޮކް ކުޅެފައި ވަނީ އީދަށް ޝޯވ ދިނުމަށް އެ ރަށަށް ގޮސް ތިބި ގުރޫޕެއްގެ އަންހެނުންތަކެއްކަމަށް ފުލުހުން ބުންޏެވެ.
މިސްކިތުގައި ޓިކްޓޮކް ކުޅުމަށް ފަހު، އެ ވީޑިއޯ އާންމު ކުރީ އެންމެ ފުރަތަމަ އެ ގުރޫޕުގެ އެކައުންޓުންނެވެ. ފާޑުކިއުން އަމާޒުވެ، މިހާރު އެ ވީޑިއޯ ނަގާފައިވީ ނަމަވެސް ސޯޝަލް މީޑިއާގައި މިސްކިތުގައި ނެގި ޓިކްޓޮކް ދަނީ ދައުރުވަމުންނެވެ.
އަޟްހާ އީދު ފާހަގަކުރުމަށް، ރާއްޖޭގެ ރަށްތަކުގައި ގިނަ ހަރަކާތްތަކެއް ކުރިޔަށް ގެންގޮސްފައި ވަނީ މާލެއިންނާއި އެހެން ސަރަހައްދުތަކުން ގުރޫޕުތައް ގެންގޮސްގެންނެވެ.
