ދިވެހިރާއްޖެއާއި އިންޑިއާ ދެމެދު ހަދާފައިވާ އެއްބަސްވުމެއްގެ ދަށުން ކާޑުގެ ބާވަތްތަކާއި އަސާސީ މުދާ ގެނައުމަށް ބޭނުން ކުރެވޭ ބަނދަރުތަކުގެ ލިސްޓަށް ދެ ޕޯޓު އިތުރުކޮށްފި އެވެ.
އިންޑިއާގެ ސަރުކާރުން އައު ދެ ޕޯޓު އިތުރު ކުރިއިރު، މި އަހަރުގެ ކުރީކޮޅު އެ ގައުމުގެ ޑިރެކްޓަރ ޖެނެރަލް އޮފް ފޮރިން ޓްރޭޑުން ނެރުނު ލިސްޓުގައި ރާއްޖެއަށް އަސާސީ މުދާ އެތެރެ ކުރުމަށް ކަނޑައަޅާފައި ވަނީ ހަތަރު ޕޯޓެކެވެ. އެއީ ޓުޓިކޮރިން ޕޯޓާއި، މުންދްރާ ޕޯޓުގެ އިތުރުން ނަވަޝޭވާ ޕޯޓާއި ތަގް ލުކާބާދު ޕޯޓެވެ.
އިންޑިއާގެ ފޮރިން ޓްރޭޑުން ނެރުނު ބަޔާނުގައި ވަނީ، ލިސްޓަށް އަލަށް އިތުރު ކުރީ ކަންޑްލާއާއި ވިޝާޕަޓްނަމް ޕޯޓުކަމަށެވެ.
އަސާސީ މުދާ އެކްސްޕޯޓު ކުރުން އިންޑިއާގައި މަނާކޮށްފައި އޮތް ނަމަވެސް ރާއްޖެއަށް އެ މުދާތައް ގެންނަނީ އެ ގައުމުގެ ނެއިބަހުޑް ފަސްޓް ޕޮލިސީގެ ދަށުންނެވެ.
މީގެއިތުރުން ރާއްޖެ – އިންޑިއާ ދެމެދުވެފައިވާ އެއްބަސްވުމުގެ ދަށުން އަސާސީ މުދާ ރާއްޖެއަށް ގެނައުމަށް ދީފައިވާ މުއްދަތާއި، އަދަދު ވެސް މިދިޔަ އޭޕްރިލް މަހު އެ ގައުމުން ވަނީ އިތުރުކޮށްދީފަ އެވެ. ނެއިބަހުޓް ފަސްޓް ޕޮލިސީގެ ދަށުން ނިންމި، މި ނިންމުމަކީ މިއީ 1981 ވަނަ އަހަރުގައި އެއްބަސްވުން ގާއިމު ކުރިފަހުން މިހާތަނަށް ހުއްދަ ދިން އެންމެ ބޮޑު އަދަދެވެ.
އޭގެ ތެރޭގައި ހިމެނެނީ ފިޔާ، ހަނޑޫ، ހަކުރު، ފުށް، އަލުވި، ބިސް އަދި މުގާއި ހިލައާއި ހިލަވެއްޔެވެ.
ދެން ހިމެނޭ ބާވަތްތަކަކީ:
427 މިލިއަން ބިސް
24513.08 މެޓްރިކް ޓަނުގެ އަލުވި
35،749.13 މެޓްރިކް ޓަނުގެ ފިޔާ
124،218.36 މެޓްރިކް ޓަނުގެ ހަނޑޫ
109،162.96 މެޓްރިކް ޓަނުގެ ފުށް
64،494.33 މެޓްރިކް ޓަނުގެ ހަކުރު
224.48 މެޓްރިކް ޓަނުގެ މުގު
އެއް މިލިއަން މެޓްރިކް ޓަނުގެ ހިލައާއި، ހިލަވެލި
އިންޑިއާއިން ބައެއް ބާވަތްތައް އެކްސްޕޯޓްކުރުން މަނާކުރާ ހާލަތުގައި ވެސް، މި އެއްބަސްވުމުގެ ދަށުން ރާއްޖެއަށް އެއްވެސް ދަތިކަމެއް ނެތި ހާއްސަ އަގުތަކުގައި މި ބާވަތްތައް އަބަދުވެސް ލިބެ އެވެ.
