ކަންގަނާ ރަނާވަތު ލީޑް ރޯލުގައި ފެންނަ ”އިމަޖެންސީ“ ފިލްމުގެ ޓްރެއިލަރު ބުދަ ދުވަހު ދޫކޮށްލައިފިއެވެ.
މި ޓްރެއިލަރުން ދައްކައިދެނީ އިންދިރާ ގާންދީގެ ބައްޕަ އަދި އިންޑިއާގެ ފުރަތަމަ ބޮޑުވަޒީރު ޖަވާހަރުލާލް ނެހްރޫ އަވަހާރަވުމަށްފަހު އިންދިރާ ބާރުވެރިވެގެން ދިޔަ ގޮތެވެ.
ޓްރެއިލަރުގައި ދައްކައިދެނީ އޭނާގެ ބައްޕަގެ ކިބައިން ބާރު އަތުލައިގަތްކަމުގެ ތުހުމަތުތަކާއެކު އިންދިރާ ވެރިކަމަށް އައި ގޮތެވެ. ޓްރެއިލަރުން ދޭހަވާގޮތުގައި މި ފިލްމުގެ ވާހަކަ އެކުލެވިގެންވަނީ އިންދިރާގެ ބޮޑުވަޒީރުކަމުގެ ދުވަސްވަރަށެވެ.
މީގެ ތެރޭގައި 1966 ގައި އޭނާ ފުރަތަމަ ވެރިކަމާ ހަވާލުވި ދުވަސްވަރާއި، 1971 ގައި ޕާކިސްތާނާއެކު ހިނގި ހަނގުރާމައިގައި އޭނާ ނިންމި ނިންމުންތަކާއި، އިންޑިއާގެ ތާރީޚުގައި އެންމެ އަނދިރި ބާބުކަމަށް ބުނެވޭ އިމަޖެންސީގެ ދުވަސްވަރު ހިމެނެއެވެ.
މި ދުވަސްވަރަކީ އަސާސީ ޙައްޤުތައް ހަނިކުރެވި، ސަރުކާރުން ވެރިކަން ކުރި ދުވަސްވަރެވެ. އަދި މި ފިލްމުގައި އިންދިރާ އަވަހާރަކޮށްލި ހާދިސާވެސް ހިމެނޭނެ ކަމަށް ފެނެއެވެ.
މި ފިލްމުގައި، ކަންގަނާ އިންދިރާގެ ދައުރު އަދާކުރަނީ އަމިއްލަ ވެރިއެއްގެ ގޮތުގައެވެ. އަދި އިންދިރާގެ ވެރިކަމުގެ ދަށުން ޑިމޮކްރަސީގެ ހަމަތަކަށް އިޙްތިރާމް ނުކުރެވުނުކަން ތަކުރާރުކޮށް ދައްކުވައިދެއެވެ. އޭނާ ބުނަނީ ”އިންޑިއާއަކީ އިންދިރާއޭ، އަދި އިންދިރާއަކީ އިންޑިއާއޭ“ އަދި ”ކެބިނެޓަކީ ހަމައެކަނި އަހަރެންނޭ“.
ފިލްމުގައި އިންދިރާ ސާފުކޮށް ބުނަނީ އޭނާ ސިޔާސަތުގައި އުޅެނީ އަމިއްލަ މަންފާއަށްޓަކައި ކަމަށާއި، ޤައުމުގެ ލާބައަށްޓަކައި ނޫންކަމަށެވެ. އެހެންނަމަވެސް އޭނާ ލޮލުގައި ކަރުނަ ހިފަހައްޓައިގެން ބުނަނީ، ”މި ޤައުމުން އަހަންނަށް ލިބުނީ ހަމައެކަނި ނަފުރަތޭ، އިތުރު އެހެން އެއްޗެއް ލިބުނުތަ؟“
މީގެ އިތުރުން، ފިލްމުން އިންދިރާގެ ދިރިއުޅުމުގެ އެންމެ ބޮޑު ނުބައި މީހާގެ ގޮތުގައި އޭނާގެ ދަރިފުޅު ސަންޖޭ ގާންދީ ފާހަގަކުރެއެވެ.
