އަދާލަތު ޕާޓީއަކީ ސިޔާސީ މަސައްކަތްތަކުގައި އިތުބާރުކުރެވޭ ބައިވެރިއެއްކަމަށް އެމްޑީޕީގެ ޗެއަރޕާސަން ފައްޔާޒް އިސްމާއިލް ވިދާޅުވެއްޖެއެވެ.
އަދާލަތު ޕާޓީއަށް 19 އަހަރު ފުރުން ފާހަގަކޮށް ކުރީގެ އިގްތިސާދީ ވަޒީރުވަނީ އެ ޕާޓީގެ ވެރިކަމުގައި ކޯލިޝަން ބައިވެރިއެއްގެ ގޮތުގައި އޮތް އަދާލަތު ޕާޓީއަށް ތަހިނިއްޔާ ފޮނުއްވާފައެވެ. ފައްޔާޒް ވިދާޅުވީ، ވޭތުވެދިޔަ މުއްދަތުގައި އަދާލަތު ޕާޓީއިންވަނީ ވަނީ ދިވެހިރާއްޖެއަށް ސިޔާސީ ޕާޓީތަކުގެ މުހިންމުކަން ސާތިބުކޮށްދީފައިކަމަށެވެ.
އޭނާ ވިދާޅުވީ، ރާއްޖޭގައި މެދުކެނޑުމެއް ނެތި ދެމިއޮތް ދެވަނައަށް އެންމެ ދޮށީ ސިޔާސީ ޕާޓީގެ ހައިސިއްޔަތުން އަދާލަތުގެ ތަޖުރިބާ ރާއްޖޭގެ ސިޔާސީ މަސްރަހަށް ނުހަނު މުހިންމުކަމަށާއި ދިވެހިރާއްޖެއިން ކޮށްފައިވާ އިސްލާހީ ދަުތުރުގައި އެ ޕާޓީއަކީ ރާއްޖޭގެ ރައްޔިތުންގެ މުހިންމު ބައިވެރިއެއްކަމަށެވެ. ފައްޔާޒް ވިދާޅުވީ ވޭތުވެދިޔަ 10 ވަރަކަށް އަހަރު އޭނާގެ ތަޖުރިބާގައި އަދާލަތު ޕާޓީއަކީ ސިޔާސީ މަސައްކަތްތަކުގައި އިތުބާރު ކުރެވޭ ރައްޔިތުންގެ ލާބައާއި މަންފާއަށް ކުރެވުނު މަސައްކަތްތަކުގެ އިހުލާސްތެރި ބައިވެރިއެއްކަަމަށެވެ.
