މި ސަރުކާރު ވެރިކަމަށް އައުމަށް ފަހު ޖަލު ބަންދުގައި ތިބޭ ގައިދީންނަށް ކުރާ އަނިޔާތައް އިތުރުވެފައިވާކަމަށާއި، މިއީ އެމްޑީޕީގެ ރީފޯމްގެ ކާމިޔާބު މަސައްކަތްތަކުގެ ފަހަތަށް އެޅޭ ފިޔަވަޅެއްކަމަށް ވަައިކަރަދޫ ދާއިރާގެ މެމްބަރު ހުސެއިން ޒިޔާދު ވިދާޅުވެއްޖެ އެވެ.
މާލޭގައި އަންހެނަކު ރަހީނުކޮށް ބިރު ދެއްކި މައްސަލައިގައި ޝަރީއަތް ނިމެންދެން ބަންދުގައި ހުއްޓައި ކުށުގެ ތުހުމަތު ކުރެވޭ އާދަމް އަތުހަރު، 32 އަހަރު އަމިއްލައަށް މަރުވާން މަސައްކަތްކޮށްގެން އައިޖީއެމްއެޗުގައި ފަރުވާ ދެމުން ދަނިކޮށް މިދިޔަ އާދީއްތަ ދުވަހު ވަނީ މަރުވެފަ އެވެ. އޭނާއަށް ޖަލުގައި ފުލުހުން އަނިޔާ ކުރީކަމަށް ތުހުމަތު ކުރި ނަމަވަވެސް، އެކަން ދޮގުކޮށް ހޯމް މިނިސްޓްރީ ވަނީ ގޮޅީގެ މަންޒަރު ފެންނަ ސީސީޓީވީ ވީޑީއޯ މީޑިއާތަކަށް ދައްކާފަ އެވެ.
މި ހާދިސާގައި އެންމެ ބޮޑަށް އުފެދުނު ސުވާލަކީ، އަތުހަރު ގޮޅީގައި ދަން ޖެހުނުތާ 30 މިނެޓު ފަހުން ފުލުހުންނަށް އެ މަންޒަރު ފެނި އޭނާއަށް ފަރުވާ ދިނުމުގެ މަސައްކަތް ފެށުމެވެ.
ރޭގެ ޖަލްސާގައި ޒިޔާދު ވިދާޅުވީ ސަރުކާރުގެ މިވީ އަށް މަސް ދުވަހުގެ ތެރޭގައި ރައްޔިތުންގެ އޮތީ މާޔޫސްކަމާއި ޝަކުވާކަމަށެވެ. އަދި ރައްޔިތުންގެ ހައްގުތަކާއި ގުޅިފައިވާ އެތައްކަމަކަށް ސަރުކާރުން އިހުމާލުވާކަމުގެ އަޑުތައް ގަދަވަމުންދާކަމަށް ޒިޔާދު ވިދާޅުވި އެވެ.
ޕާޓީގެ ތާރީހުގައި އެންމެ ބޮޑަށް ވަކާލާތު ކުރީ ޖަލު ބަންދުގައި ތިބޭ މީހުންގެ ހައްގުގައިކަމަށާއި، އެ މީހުންނަށް އެ ތެރިތަކުގެ ތެރޭގައި ކުރާ އަނިޔާތަކަށް ނިމުމެއް ގެނައީ ވެސް އެމްޑީޕީކަމަށް ޒިޔާދު ވިދާޅުވި އެވެ. އެހެން ނަމަވެސް މި ސަރުކާރު ވެރިކަމާއި ހަވާލުވުމާއި އެކު އެމްޑީޕީ ޖަލުތައް ރީފޯމްކޮށް ހޯދި ކާމިޔާބީތަކުން ފަހަތަށް ފިޔަވަޅު އަޅަމުން ދިއުމަކީ ކަންބޮޑުވުމެއްކަމަށް އޭނާ ވިދާޅުވި އެވެ.
މި ސަރުކާރު މިހާ ހިސާބަށް އައިއިރު ވަރަށް ގިނަ ޝަކުވާ އަޅުގަނޑުމެންނާއި ހިސާބަށް ވެސް އެބައާދޭ.. އެންމެ ބޮޑު ޝަކުވާއަކަށް، އެންމެ ބޮޑު ޝަކުވާއަކީ އަޅުގަނޑުމެން މިއަދު ވެސް ދޫކޮށްނުލެވޭ ވަރުގެކަމެއް މިހާރު ހިނގަމުން އެ ދަނީ، ހާއްސަކޮށް މި ޕޯޑިއަމްގަ.. އެމްޑީޕީގެ ޕޯޑިއަމްގައި އެންމެ ގަދައަށް ދެކެވެއްމުން ދިޔަ ވާހަކައަކީ ދައުލަތުގެ ބެލުމުގެ ދަށުގައި ތިބޭ މީހުންނަށާއި، ޖަލުގައި ތިބޭ މީހުންނަށް ކުރާ އަނިޔާގެ ވާހަކަ..
ޖަލުގައި އަނިޔާ ކުރުން އާންމުވީއިރު، އެކަމަށް ސަރުކާރުގެ އެއްވެސް ބަހެއް ލިބިފައި ނުވުމަކީ އެއީ އެމްޑީޕީ މަސައްކަތަށް ނިކުންނަން ޖެހޭ ސަބަބެއްކަމަށް ޒިޔާދު ވިދާޅުވި އެވެ. އަދި ޖަލުގައި މީހަކު މަރުވުމުގެ ދެ ހާދިސާ ހިނގިއިރު ހޯމް މިނިސްޓަރ އަލީ އިހުސާން ނޫން އިތުރު ބޭފުޅަކު އެކަމަށް ވާހަކަ ދެއްކެވިތަން ނުފެންނަކަމަށެވެ.
އަތުހަރު ޖަލުގައި ދަން ޖެހިގެން މަރުވި މައްސަލަ ނެޝަނަލް އިންޓެގްރިޓީ ކޮމިޝަނާއި، ހިއުމަން ރައިޓް ކޮމިޝަނުން މިހާރު ދަނީ ތަހުގީގު ކުރަމުންނެވެ.
