އިސްލާމީ ސަޤާފަތާއި ރިވެތި އާދަކާދައާއި އަޚުލާޤު ދިރިވުމަށް ރައީސުލްޖުމްހުރިއްޔާ ޑރ މުހައްމަދު މުއިއްޒު ގެންގުޅުއްވަނީ ޤައުމަށް ބޭނުންތެރި ތަސައްވުރެއްކަމަށް އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް އަލީ ސަޢީދު ވިދާޅުވެއްޖެއެވެ.
ޤައުމީ ދުވަސް ފާހަގަކުރުމަށް ރޭ ހއ. އުތީމުގައި ކުރިއަށްދިޔަ ރަސްމީ ޖަލްސާ ޝަރަފްވެރިކޮށްދެއްވާ ވާހަކަފުޅު ދައްކަވަމުން ޑރ ޝަހީމް ވިދާޅުވީ، ޤައުމުން ބީވެގެންދާ އިސްލާމީ ސަގާފަތާއި ރިވެތި އާދަކާދައާއި އަޚްލާގު ދިރުވުމަށްޓަކައި ރައީސް ޑރ. މުޢިއްޒު ގެންގުޅުއްވާ ތަސައްވުރަކީ މިއަދު ޤައުމު އިންތިހާއަށް ބޭނުންވާ ތަސައްވުރެއް ކަމަށެވެ.
ކުރިމަގުގެ ޖީލުތަކަށްޓަކައި އަޅުގަނޑުމެން މިއަދު އެ ތަސައްވުރުގެ އަލީގައި މަސައްކަތްތަކެއް ކުރަންޖެހޭ.
ޑރ ޝަހީމް ވިދާޅުވިއެވެ.
ޑރ ޝަހީމް ވިދާޅުވީ، މުޙައްމަދުތަކުރުފާނުގެ ސިޔަރަތުން އަދުގެ ޖީލު ފިލާވަޅުތަކެއް ލިބިގަންނަން ޖެހޭ ކަމަށާއި، މުޙައްމަދު ތަކުރުފާނަކީ ހިތްވަރާއި އަޒުމުގެ މަދަރުސާއެއްކަމަށާއި ޤައުމު ދެކެ ލޯބިވުމާއި ދީނަށް ވަފާތެރިވެ އަގީދާއަށް އަމާނާތްތެރިވުމުގެ މަތިވެރި ނަމޫނާއެއް ދެއްކެވި ޝަޚުސިއްޔަތެއްކަމަށެވެ. އެފަދަ އިތުރު ޝަޚްސިއްޔަތުތައް ނެރެދެއްވުމަށް އެމަނިކުފާނު އެދިވަޑައިގެންނެވިއެވެ.
އުތީމަކީ ދިވެހި އުއްމަތަށް، ޒަޢާމަތެއް ނެރުއްވި މަދަރުސާއެއްކަމަށާއި ރަށް ކުޑަ ނަމަވެސް ފަޚުރުވެރި ތާރީޚުގައި އުތީމުގެ ނަން ލިޔެވިފައި އޮތީ ރަން އަކުރުކަމަށް ފާހަގަކޮށް ވަޒީރު ވިދާޅުވީ މިއަދުވެސް އެފަދަ ޝަހުސިއްތުތައް ނުނެރެވެންވީ އެއްވެސް ސަބަބެއްނެތްކަމަށެވެ.
