ޣައްޒާގެ އަލް-ނުސައިރަތު ކޭމްޕަށް އިސްރާއީލު ސިފައިން ދިން ހަމަލާއާއި ހިންގި ޤަތުލުއާއްމު ދިވެހި ސަރުކާރުން ކުށްވެރިކޮށްފިއެވެ.
އެ ޙަމަލާ ކުށްވެރިކޮށް ދިވެހި ސަރުކާރުން ނެރުނު ބަޔާނުގައި ބުނެފައިވަނީ، ބައިނަލްއަޤްވާމީ ޤާނޫނުތަކާއި ބައިނަލްއަޤްވާމީ އިންސާނިއްޔަތާބެހޭ ޤާނޫނުތަކާ ޚިލާފަށް، އާންމުންނަށް އަމާޒުކޮށް އިސްރާއީލުންދޭ މިފަދަ ހަމަލާތަކުގެ ސަބަބުން ޣައްޒާގެ އިންސާނީ ހާލަތު ބަޔާންވެސް ނުކުރެވޭފަދަ މިންވަރަކަށް ގޯސްވެފައިވާކަމަށެވެ. އަދި މިފަދަ އަމަލުތައް ހުއްޓުވުމަށް ބައިނަލްއަޤްވާމީ މުޖުތަމަޢިން އަވަސް، ހަރުދަނާ ފިޔަވަޅުތަކެއް އަޅަންޖެހޭކަމަށް ދިވެހިރާއްޖެއިން ޤަބޫލުކުރާ ކަމަށްވެސް ބަޔާންކޮށްފައިވެއެވެ.
އޭގެ އިތުުރުން، އިސްރާއީލުގެ ހަރުކަށި ހަމަލާތައް ހުއްޓުވުމަށާއި ހަމަނުޖެހުންތައް ނައްތާލައި، ކުށެއް ނެތް އާންމުން ހިމާޔަތްކޮށް، މެދުއިރުމަތީ ސަރަޙައްދުގައި ދެމެހެއްޓެނިވި ޞުލްޙަ ޤާއިމުކުރުމަށް އަޅަންޖެހޭ އަވަސް ފިޔަވަޅުތައް އެޅުމަށް ދިވެހި ސަރުކާރުން ބައިނަލްއަޤްވާމީ މުޖުތަމަޢަށް ގޮވާލާ ގޮވާލުންވެސް ވަނީ ތަކުރާރުކޮށްފައެވެ.
ފަލަސްޠީނުގެ ރައްޔިތުން ޢަދުލުއިންސާފު ހޯދުމަށާއި މިނިވަން ދައުލަތެއް ޤާއިމުކުރުމަށް ކުރަމުންދާ މިންނެތް މަސައްކަތުގައި ފަލަސްޠީނުގެ ރައްޔިތުންނާއެކު ދިވެހިރާއްޖެއިން އަބަދުވެސް ދެމިއޮންނާނޭކަމުގެ ޔަޤީންކަން ދިވެހި ސަރުކާރުން ދީފައިވެއެވެ.
