އެމެރިކާއިން ބައިނަލްއަގުވާމީ މުޖުތަމައަށް ދެމުންދާ މާލީ އެހީތައް މަޑުޖައްސާލުމަށް ޓްރަމްޕުގެ ސަރުކާރުން މަސައްކަތްތައް ފަށާފައިވަނިކޮށް ޔޫއެސްއެއިޑްގެ ވެބްސައިޓް އޮފްލައިންވެއްޖެއެވެ.
ނޫސްތަކުން ބުނާގޮތުން ޓްރަމްޕުގެ ސަރުކާރުންވަނީ މިހާރުވެސް ކުރީގެ ރައީސް ޖޯ ބައިޑެންގެ ސަރުކާރުން ފަށާފައިވާ އެތައް މަސައްކަތްތަކެއް ހުއްޓާލާފައެވެ. މިއީ އެ ދައުރުގައި ބައިނަލްއަގުވާމީ މުޖުތަމައަށް އެހީތެރިކަން ދިނުމުގެ ނަމުގައި ފަށާފައިވާ މަސައްކަތްތައް މަޑުޖައްސާލުމަށް ޓްރަމްޕުގެ ސަރުކާރުން ފަށާފައިވާ މަސައްކަތްތަކުގެ ތެރެއިން ބައެއްކަމަށްވާއިރު މި މަހުގެ އެއް ވަނަ ދުވަހު އެމެރިކާއިން ބައިނަލްއަގުވާމީ މުޖުތަމައުގެ ތަރައްގީއަށް އެހީތެރިކަން ދިނުމަށްޓަކައި އުފައްދާފައިވާ އެޖެންސީގެ ވެބްސައިޓުވެސް ވަކި ސަބަބެއް އެންގުމެއް ނެތި އޮފްލައިންވެފައިވާކަމަށް ރިޕޯޓުތަކުގައިވެއެވެ.
އެ ގައުމުގެ ޑިމޮކްރެޓިކް ޕާޓީގެ މެމްބަރުންގެ ކަންބޮޑުވުންތައް ހުރިގޮތުން ޓްރަމްޕު މަސައްކަތްކުރައްވަމުންދަނީ މިނިވަންކޮށް ހަރަކާތްތެރިވާ މުއައްސަސާއެއްކަމަށްވާ ޔޫއެސްއެއިޑްގެ ހަރަކާތްތައް ނިމުމަކަށް ގެނެސް ސްޓޭޓް ޑިޕާޓުމެންޓުގެ ތެރެއަށް އެ މަސައްކަތްތައް ފެއްތުމަށްކަމަށެވެ. ނަމަވެސް އެއީ ގާނޫނީގޮތުން ޓްރަމްޕަށް ކުރެވިދާނެކަމެއްގެ ގޮތުގައި ނުދެކޭކަން ޑިމޮކްރެޓުން އެކި ޕްލެޓުފޯމްތަކުގައި ހިއްސާކުރާއިރު އެއީ މަޖިލީހުގެ ރުހުމާއި ބާރު ލިބި ފަންޑުތައް ހޯދައިގެން އެ ގައުމުގެ ސަލަމާތައި ރައްކައުތެރިކަން ކަށަވަރުކުރުމަށްވެސް މުހިިންމު މަސައްކަތްތަކެއް ކުރާ ބައެއަކަމަށްވެސް ބުނެފައިވެއެވެ.
ޓްރަމްޕު އަދި ރިޕަބްލިކަން ޕާޓީއަށް ނިސްބަތްވާ މެމްބަރުން ދެކިވަޑައިގަންނަވާގޮތުން ބޭރުގެ ތަރައްގީއަށް ހިންގަމުންދާ ގިނަ ޕްރޮގްރާމްތަކަކީ އިސްރާފެކެވެ. އަދި އެ ޕާޓީގެ އެޖެންޑާ ކުރިއެރުވުމަށްފަހިވާ ޕްރޮގްރާމްތަކަށް ޖާގަ ދޭކަން ފެނިގެންދާކަމަށްވެސް ބައެއް ރިޕޯޓުތަކުގައިވެއެވެ. އެމެރިކާއަކީ މިހާތަނަށްވެސް އެންމެ ބޮޑަށް އިންސާނީ އެހީތެރިކަން ފޯރުކޮށްދެމުންދާ ގައުމުކަމަށްވާއިރު އަހަރީ ބަޖެޓުގެ ނިސްބަތުންނަމަ ހަރަދުކުރަނީ އެއް އިންސައްތައަށްވުރެވެސް ދަށުންކަމަށް ނޫސްތަކުން ބުނެއެވެ. މިއީ ގިނަ އެހެނިހެން ގައުމުތަކުން ބަޖެޓުގެ ނިސްބަތުން ހަރަދުކުރާ ވަރަށްވުރެ ކުޑަ އަދަދެކެވެ.
ޔޫއެސްއެއިޑްގެ މިނިވަން ހައިސިއްޔަތަށް ޓްރަމްޕު ނިމުމެއް ގެނައުމަށް މަސައްކަތްކުރާކަމަށް ކުރެވޭ ތުހުމަތުތަކާއި ގުޅޭގޮތުން ކުރި ސުވާލުތަކަށް މިފަދަ އިދާރީ މަސައްކަތްތަކާއި ހަވާލުވެ ހުންނެވި އިދާރީ މުއައްޒަފުން ޖަވާބެއް ދީފައިނުވެއެވެ. ޔޫއެސްއެއިޑްއަކީ ފިނި ހަނގުރާމައިގެ ދުވަސްވަރު ރަޝިއާގެ ނުފޫޒާއި ދެކޮޅަށް މަސައްކަތްކުރުމަށްޓަކައި އޭރު ހުންނެވި ރައީސް ޖޯން އެފް ކެނެޑީ އުފެއްދެވި މުއައްސަސާއެކެވެ. މިހާރު އެ މުއައްސަސާއަކީ ޗައިނާއިން ދުނިޔޭގެ ގައުމުތަކަށް ފޯރުވަމުންދާ ނުފޫޒާއި ދެކޮޅަށް ކުރެވޭ މަސައްކަތްތަކުގައި މުހިންމު ދައުރެއް އަދާކުރާ ބައެއްކަންވެސް ރިޕޯޓުތަކުން ފާހަގަކުރެއެވެ.
