އެމެރިކާގެ މަޝްހޫރު ޓީވީ ޗެނަލްއެއްކަމަށްވާ ސީބީއެސްއިން އެމެރިކާގެ ރިޔާސީ އިންތިހާބު ދުވަސްވަރު ގެނެސްދިން ކަމަލާ ހެރިސްގެ އިންޓަރވިއުއެއްގެ އެޑިޓްނުކުރާ ފައިލު އެ ގައުމުގެ ކޮމިއުނިކޭޝަންސް ކޮމިޝަނާއި ހަވާލުކުރަން އެ ޗެނަލްއިން އެއްބަސްވެއްޖެއެވެ.
ނޫސްތަކުން ބުނާގޮތުން މިހާރުގެ ރައީސް ޑޮނަލްޑް ޓްރަމްޕުވަނީ ސީބީއެސްއިން ސިޔާސީ މަސައްކަތްތަކުގެ ތެރޭގައި ނަހަމަ އަމަލުތަކެއް ހިންގައި އޭނާގެ ވާދަވެރިޔާ އޭރުގެ ނައިބުރައީސް ކަމަލާ ހެރިސްއަށް ނުހައްގުން ކުރި ހޯދައިދިނުމަށް މަސައްކަތްތަކެއް ކޮށްފައިވާކަމަށް ތުހުމަތުކޮށް 10 ބިލިއަން ޑޮލަރު ހޯދުމަށް އެދި ޗެނަލްއާއި ދެކޮޅަށް ކޯޓަށް މައްސަލަ ހުށައަޅާފައެވެ. ސީބީއެސްގެ ވެރި ކުންފުނި ޕެރަމައުންޓުންދަނީ މިކަމުގައި ކޯޓުން ބޭރުން އެއްބަސްވުމަކަށް ވާސިލުވުމުގެ ގޮތުން ޓްރަމްޕުގެ ވަކީލުންނާއި މަޝްވަރާކުރަމުންކަންވެސް ނޫސްތަކުން ފާހަގަކުރެއެވެ.
ސީބީއެސްއިން ބުނާގޮތުން އެ ޗެނަލްއިން ކަމަލާގެ އިންޓަރވިއުގެ އެޑިޓްނުކުރާ ލިޔެކިއުންތަކުގެ އިތުރުން ވީޑިއޯތައްވެސް ދިނުމަށް އެއްބަސްވެފައިވަނީ ފެޑަރަލް ކޮމިއުނިކޭޝަންސް ކޮމިޝަންގެ ޗެއަރމަންގެ މަގާމަށް ޓްރަމްޕު އައްޔަނުކޮށްފައިވާ ބްރެންޑަން ކާރ އެކަމަށް ބާރުއަޅުއްވައި ނުފޫޒުގެ ބޭނުންކުރައްވާފައިވުމުންކަމަށެވެ. މީގެ ކުރިން އެ ޗެނަލްއިންވަނީ އެޑިޓިންގް މަސައްކަތްތަކާއި ގުޅޭގޮތުން ސުވާލުތައް އުފެއްދުމަށް ޖާގަ ނުދިނުމުގެ ގޮތުން އިންޓަރވިއުތަކުގެ ފައިލުތައް ހަވާލުކުރުމަށް ދެކޮޅު ހަދާފައިކަން ފާހަގަކުރެވެއެވެ.
ނޫސްވެރިކަމުގެ މިނިވަންކަމަށް ވަކާލާތުކުރާ އެކި ފަރާތްތަކުންދަނީ މި މައްސަލަ ގާތުން ބަލަމުންކަމަށްވާއިރު ސީބީއެސްގެ ވަކީލުންވަނީ ޓްރަމްޕު އަމަލުކުރައްވަމުންދަނީ އެއްވެސް އަސާސެއް ނެތިކަން ތަކުރާރުކޮށް ބުނެފައިކަން ރިޕޯޓުތަކުގައިވެއެވެ. ސީބީއެސްއިން ގެނެސްދިން ކަމަލާގެ އިންޓަރވިއުއަށް ސަމާލުކަން ހުއްޓިގެންދިޔައީ އެ އިންޓަރިވިއު ދެއްކި އެކި ފުރުސަތުތަކުގައި ކަމަލާ އެއް ސުވާލަކަށް އެކި ޖަވާބުތައް ދެއްވާފައިވާކަން ފެނިގެންދިއުމާއިއެކުއެވެ. ނަމަވެސް ސީބީއެސްއިން އޭރު ބުނެފައިވަނީ އެއީ ކަމަލާ ދިގު ޖަވާބުތަކެއް ދެއްވުމާއި ގުޅިގެން ކަނޑައެޅިފައިވާ ވަގުތުގެ ތެރެއަށް ފެއްތުމުގެ ގޮތުންނާއި އޭނާ ދެއްވި ޖަވާބުތައް ފުރިހަމައަށް ގެނެސްދިނުމުގެ ގޮތުން އެޑިޓްކޮށްފައިވާ ގޮތްކަމަށެވެ.
ޓްރަމްޕު އެ ޗެނަލްއާއި ދެކޮޅަށް ދައުވާކުރެއްވީ އޮޅުވާލުމުގެ ގޮތުން އެޑިޓްތަކެއް ކޮށްފައިވާކަމުގެ އިތުރުން ވޯޓަށް ނުފޫޒުފޯރުވުމަށް މަސައްކަތްކޮށްފައިވާކަމަށް ބުނެކަން ފާހަގަކުރެވެއެވެ. މި ދައުވާކުރިތާ ހަފްތާއެއްހާ ދުވަސްފަހުން ޓްރަމްޕަށް އިންތިހާބުގައި ކާމިޔާބު ލިބިވަޑައިގެންނެވި ނަމަވެސް އަދިވެސް ދޫދިނުމުގެ އެއްވެސް އިޝާރާތެއް ފެނިފައިނުވެއެވެ. ނެޓްވޯގް ފަރާތުން ޓްރަމްޕާއި ދެމެދު ކޯޓުން ބޭރުން އެއްބަސްވުމެއް ގާއިމުކުރުމަށް މަސައްކަތްކުރާކަމުގެ ވާހަކަތަކާއި ގުޅޭގޮތުން ކޮމެންޓެއް ލިބިފައިނުވެއެވެ. ނަމަވެސް ބައެއް ރިޕޯޓުތަކުގައިވާގޮތުން ޕެރަމައުންޓުން މިހާރު މަސައްކަތްކުރަމުންދަނީ ޓްރަމްޕުގެ ސަރުކާރުގެ ރުހުމާއިއެކު އެ ނެޓްވޯގް ސްކައިޑާންސްކިޔާ ކުންފުންޏަކަށް ވިއްކާލުމަށެވެ.
